amalinks wokungena

Breaking News

Selikhokhela Ngemiklomelo Emihlanu Iqembu leCAPS United


Iqembu lenguqu eleCaps United

Iqembu le CAPS United likhuphule inani lemiklomelo elilayo laya kumatshumi amane lesikhombisa ngemva kwemidlalo eyeviki lamatshumi amabili lanhlanu lapho elinqobe khona ele Mushowani Stars nge 2 ka 1.

Limpumela itsho ukuba iqembu le CAPS selitshiya amaqembu alilandelayo abalisa ele Chicken Inn kanye lele FC Platinum ngemiklomelo emihlanu ngemva kokuba ele Chicken Inn libe ngutshiki lobhanqa 1 ka 1 lele Chapungu kuthi ele FC Platinum lona libe ngutshiki lobhanqa 0 ka 0 lele ZPC Kariba.

Umqeqeshi weqembu lenguqu eleChicken Inn, uJoey Antipas
Umqeqeshi weqembu lenguqu eleChicken Inn, uJoey Antipas

Loba kunjalo umqeqetshi weChicken Inn, uJoey Antipas uthi iqembu lakhe, lisaselalo ithuba elokuphakamisa isicoco seligi loba nje selitshiywa ngemiklomelo emihlanu liqembu elihlezi phezu kwengalane ele CAPS United.

Ekhuluma lentatheli ekupheleni komdlalo uAntipas uveze ukudana ukuba iqembu lakhe kalidlali kuhle kulezinsuku kodwa utshele intathelizindaba zemidlalo ukuba ithuba elokuphakamisa isicoco lisasekhona.

“Okumele sikwenze yikuba singalahli ithemba. Akusela mdlalo olula njengoba imidlalo isisiyafika komlindi uyacina. Akwaziwa kodwa lathi sesinganqoba imidlalo ilandelana kweminye imidlalo eyithoba minwe mbili esisele layo lathi kuke kusiyele ngasifudlana,” kutsho uAntipas.

Ngaphansi kwengalane impi eyokulwisa ukugunyulwa kusigaba saphezulu iqhubekela phambili njalo iqembu elijeke amanye wonke ele Yadah litshengise ukuba kalizimiselanga ukuyadlala kusigaba sika Division One ngokunqoba elikwenze ele Ngezi Platinum Stars nge 1 ka nya.

Limpumela itshiye iqembu le Yadah lilemiklomelo engamatshumi amabili lane kuthi phezu kwalo kulamaqembu amathathu alemiklomelo engamatshumi amabili lanhlanu njalo lawa ngabalisa ele Bulawayo Chiefs lona elibe ngutshiki lobhanqa 1 ka 1 lele Dynamos, ele Herentals lona elibe ngutshiki lobhanqa 1 ka 1 lele Highlanders, kanye lele Harare City lona elinqotshwe nge 3 ka 1 ngele Triangle.

Kusenjalo inhlanganiso ye Premier Soccer League isikhuphe umbiko isazisa uzulu ukuba imidlalo yenkezo ye Chibuku Super Cup eyadluliselwa phambili ensukwini ezedluleyo izadlalwa ngoLwesithathu lango Lwesine kuyonale iviki.

NgoLwesithathu iqembu le FC Platinum lizemukela ele Chapungu ngase Mandava kuthi ngoLwesine iqembu le Triangle lizadlala lele Herentals ngase Gibbo.

Limidlalo ibidluliselwe phambili ngoba iqembu le FC Platinum kanye lele Triangle abephatheke kumidlalo eyokudinga intshantshu zezwekazi lase Africa.

Kolunye njalo udaba olumayelana lomdlalo wenguqu umqeqetshi wakwele Zimbabwe olodumo uMadinda Ndlovu usephumile esibhedlela ngemva kokulaliswa phose okwenyanga yonke ngoba ehlaselwe ngumkhuhlane wohlangothi ngesikhathi elolonga iqembu le Gaberone United.

Umfoka Ndlovu ubanjwe yilo umkhuhlane mhla ziyisikhombisa kunyanga kaMpandula njalo imibiko evela kwele Botswana ithi uphume esibhedlela kuthange mhla zinhlanu kunyanga kaMfumfu.

please wait

No media source currently available

0:00 0:02:43 0:00

Facebook Forum

XS
SM
MD
LG