amalinks wokungena

Breaking News

Selikhuphukile Engalaneni Yemiklomelo Iqembu leHighlanders


Highlanders Football Club
Highlanders Football Club

Iqembu lomdlalo wenguqu ele Highlanders liqhubekela phambili lidlala kuhle selokhu kuzibambe esidukwini umqeqetshi omutsha uMandla Mpofu.

Iqembu le Bosso likhuphuke layahlala endaweni yethoba munwe munye engalaneni yemiklomelo lilemiklomelo engamatshumi amabili lantathu ngemva ngemva kokunqoba elikwenze ele Black Rhinos ngoMgqibelo.

Ngokwakuqala kumidlalo yalonyaka ukuba iqembu le Highlanders linqobe imidlalo ilandelana kusigaba sePremier Soccer League njalo umqeqetshi walo uMandla Mpofu uthi sebezifakele amehlo ngokunqoba kwabo lokhu.

“Nxa ungaqala ukunqoba ungumqeqetshi uyabe usozokhele amalahle ekhanda ngoba abalandeli bayabe sebekhangelele ukuba unqobe njalo emdlalweni olandelayo. Osekumele sikwenze yikuba sinqobe sidlala ibhola elinathisa amanzi ngoba uzathola ukuba abalandeli abangabonanga umdlalo wethu bayabe bethabile nxa besizwa ukuba sinqobile ikanti obone umdlalo uyabe ekhonona esithi kasidlalanga kuhle. Kimi kodwa okusemqoka okwakhathesi yikuthola imiklomelo emithathu,” kutsho uMpofu.

Phezu kwengalane yemiklomelo iqembu le FC Platinum yilo elilokhu likhokhela loba nje lona beliphatheke kumncintiswano owokudinga intshantshu zezwekazi lase Africa kulimpelaviki lapho elibe ngutshiki lobhanqa 0 ka 0 lele Nyasa Big Bullets elase Malawi emdlalweni we CAF Champions League.

Castle Lager Premier Soccer League.
Castle Lager Premier Soccer League.

Iqembu le FC Platinum lilemiklomelo engamatshumi amathathu lambili ngemva kokuba lidlale imidlalo elitshumi lesikhombisa ikanti endaweni yesibili kuhlezi iqembu le CAPS United lona elinqobe ele Manica Diamonds nge 1 ka nya ngeSonto njalo elilemiklomelo engamatshumi amathathu lowodwa njalo eselidlale imidlalo elitshumi lathoba minwe mbili.

Iqembu le Chicken Inn yilo ebelingene kumidlalo yangempelaviki lihlezi endaweni yesibili njalo bekukhangelelwe ukuba mhlawumbe lingahle lindize liyehlala phezulu kodwa linqotshwe nge 2 ka 1 ngele ZPC Kariba layala lilokhu lilemiklomelo engamatshumi amathathu.

Emsileni wengalane kuleqembu le Bulawayo Chiefs lona elibe ngutshiki lobhanqa 1 ka 1 lele Chapungu njalo elilemiklomelo elitshumi lantathu.
Endaweni yesibili nxa usuka phansi kwengalane kuleqembu le Yadah lona elilemiklomelo elitshumi lanhlanu njalo elibe ngutshiki lobhanqa 0 ka 0 lele Hwange kuthi endaweni yesithathu nxa usuka emsileni kuleqembu le TelOne elilemiklomelo elitshumi lesithupha njalo elibe ngutshiki lobhanqa 1 ka 1 lele Herentals ikanti endaweni yesine nxa usuka emsileni kuleqembu le Mushowani Stars elilemiklomelo elitshumi lesikhombisa njalo elinqotshwe nge 2 ka 0 ngele Dynamos ngeSonto.

Elinye njalo iqembu elimela ilizwe le Zimbabwe emidlalweni eyokudinga intshantshu zezwekazi lase Africa, ele Triangle libhaxabule iqembu le Rukinzo elase Burundi nge 5 ka nya kuhlandla lakuqala elomdlalo womncintiswano we CAF Confederation Cup ngeSonto.

Imidlalo yehlandla lesibili izadlalwa ngemva kwamaviki amabili.

Udaba lwezemidlalo siluphiwa nguJoseph Njanji
please wait

No media source currently available

0:00 0:02:27 0:00

XS
SM
MD
LG