Amapholisa lamasotsha sebeqalile ukuvimba endaweni ezitshiyeneyo elizweni kulandela ukuvala ngci ilizwe okwenziwe nguhulumende othi usumemetheka okwethusayo umkhuhlane weCOVID-19 eZimbabwe.
Umsekeli kamongameli njalo ophethe uhlangothi lukahulumende olubona ngezempilakahle, uRetired General Constantino Chiwenga, izolo wethule iziqondiso ezintsha zokuvimba ukumemetheka komkhuhlane weCOVID-19. Utshele intathelizindaba eHarare ukuthi sokuzavalwa amabhizimusi amanengi, agoqela awabantu abazisebenzela emigwaqweni.
Lokhu kwenzakala ngesikhathi kusanda kutholakala abantu abanengi abalomkhuhlane lo elizweni. Kumahola angamatshumi amabili lane asanda kwedlula, sokutholakala abedlula amakhulu amabili – 407 belegciwane leCOVID-19 eZimbabwe. Ngesikhathi lesi, kubhubhe abayisitshiyangalombili – 8.
Uhlangothi lwezempilakahle luthi sokulabantu abedlula inkulungwane ezilitshumi lane – 14,491 asebehlolwe kusukela ngoMbimbitho nyakenye batholakala bele coronavirus. Sokubhubhe abafika phose amakhulu amane – 377 kwathi abedlula inkulungwane ezilitshumi lanye – 11,363 baphepha kumkhuhlane lo.
Odokotela bathi uhulumende wenze kahle ukwethula iziqondiso ezizavimba abantu ukuthi bahambehambe bathelelane umkhuhlane weCOVID-19. UDokotela Gary Shava utshayela uhulumende ihlombe ngakwenzileyo.
Kodwa kulabanye abathi uhulumende bekumele atshele abantu kulesikhathi ngeziqondiso lezi ukwenzala ukuthi badinge ukudla lokunye abakufunayo. Omunye wabalombono lo nguMnu. Tjenesani Ntungakwa, ohlala eHarare.
Okwamanje, amasotsha lamapholisa sebengene emphakathini bezama ukuvimba ngendlela zonke ukuthi abantu bengaphumi ezindlini kuze kutshaye isikhathi esifakwe nguhulumende. Kulabanye abesaba ukuthi amasotsha azaqala ukutshaya abantu mahlayana.
Uhulumende ukhuthaza abantu ukuba bazinakekele ngendlela yesibanga esiphezulu, bahlale emakhaya phakathi kwensuku ezingamatshumi amathathu. Bakhuthazwa ukuthi baphume ezindlini nxa kulento enkulu ebasindayo kumbe besiyadinga ukudla.
