Amacele womabili eMDC athi akhangelele ukuthi umhlangano weSadc ozaqala eNamibia ngeSonto uhluze udaba lweZimbabwe ngokuqotho kulungisiswe okusahluphayo phansi kwesivumelwano seGlobal Political Agreement.
Abakhokheli bamacele la, abathi uMnu Arthur Mutambara loMnu Morgan Tsvangirai bazaphatheka emhlanganweni we Sadc Troika ngeSonto kanye loMongameli Robert Mugabe kuhluzwa udaba lweZimbabwe.
NgoMvulo kulapho okuzaqhutshwa khona umhlangano weSadc omqoka wona ozangenwa ngabakhokheli bamazwe akuSadc. UMutambara utshele iStudio 7 ukuthi ukhangelele ukubana iSadc ingenele ngamandla udaba lweZimbabwe lulungisiswe ngokugcweleyo.
UMongameli Jacob Zuma wakwele South Africa uzakwazisa umhlangano weSadc lo ukuthi imizamo yakhe yokulungisisa udaba lweZimbabwe sifike kuliphi izinga.
Umqondisi wogatsha olubona ngobudlelwano lamanye amazwe eSouth Africa uAyanda Ntsebula uthi uZuma uzatshela abakhokheli beSadc ukuthi lanxa kusalokudonselana phakathi kweMDC leZanu PF, uhulumende weZimbabwe ukhanya esebenza kakuhle.
AbeMDC ekhokhelwa nguMnu Tsvangirai bathi bazacela iSadc ukuthi iqalise ukucanda indlela yokhetho olukhululekileyo elizweni. Kodwa ingcwethi ezicubungula ezombusazwe zithi iSadc kayisoze yenze lutho ngokuhluphayo kuhulumende weZimbabwe.
Ingcwethi ecubungula ezombusazwe uMnu Brilliant Mhlanga uhlaziye loludaba lo Mnu Dumisani Muleya umsekeli womhleli wephephandaba leZimbabwe Independent belo Gibbs Dube weStudio 7.