amalinks wokungena

Breaking News

Singalungiselela Kusaselesikhathi Singaya kuWorld Cup: Shereni


FIFA World Cup Trophy
FIFA World Cup Trophy

Owayengumdlali weqembu lesizwe uHarlington Shereni uthi iqembu lama Warriors lingaphumelela ukuyadlala kumidlalo yezizwe zomhlaba nxa lingathola ithuba lokuba lenze amalungiselelo apheleleyo.

UShereni uthi indlela okuqhutshwa ngayo amalungiselelo nxa iqembu lesizwe lizadlala yikho okudala umehluko omkhulu phakathi kokuphumelela kanye lokungaphumeleli.

“Ngokubona kwami nxa abadlali bethu bengaphiwa isikhathi eseneleyo esokulungiselela bethole konke abakudingayo bengaphumelela. Okuhluphayo elizweni lethu yikuba senza izinto zethu isikhathi sesingasekho okokuthi kusuka kube nzima ukuba siqhube amalungiselelo akhona ngemfanelo,” kutsho uShereni.

Iqembu le Zimbabwe likusibaya sika Group G kumkhankaso wokudinga amazwe azakuyadlala kumidlalo yezizwe zomhlaba ezaqhutshelwa elizweni lase Qatar ngomnyaka ka 2022.

Amanye amaqembu akusibaya sika Group G ngabalisa ele Ghana, ele South Africa kanye lele Ethiopia.

Umkhankaso wezizwe zomhlaba bekumele uqale ngenyanga kaMfumfu kodwa usukhangelelwe ukuqala ngenyanga kaNkwenkwezi ngomnyaka ozayo ngemva kokuba idluliselwe phambili kusesatshelwa umkhuhlane we Covid 19.

Umncintiswano wokudinga amaqembu azakuyadlala kumidlalo eyokudinga intshantshu zezwekazi lase Africa ukhangelelwe ukuqhubekela phambili ngenyanga kaLwezi njalo iqembu lama Warriors lizadibana lele Algeria.

UShereni uthi lakho kumncintiswano we Afcon indlela iqembu lesizwe elizalungiselela ngayo yiyo ezadala umehluko.

“Nxa ungalungiselelanga ngemfanelo awungeke uthole impumela enhle. Akukhathalekile ukuba sidlala le Algeria kumbe sidlala le Botswana kumbe iZambia kodwa okuqakathekileyo yikuba senze amalungiselelo ngemfanelo ngoba abadlali silabo abadlala kuhle emazweni aphetsheya abangasiphathisa ukuba sinqobe,” kutsho uShereni.

Ngemva kwemidlalo emibili kusibaya sika Group H iqembu le Zimbabwe lihlezi endaweni yesibili engalaneni yemiklomelo lilemiklomelo emine kusithi iqembu le Algeria yilo elihlezi phezu kwengalane lilemiklomelo eyisithupha.

Imidlalo yenguqu elizweni imiswe umqeqetshi omutsha weqembu lama Warriors uZdravko Logarusic engakatholi ithuba elokuba ebukele abadlali abadlala besekhaya okokuthi akungeke kumangalise nxa iqembu leli lingabunjwa ngabadlali abadlala phandle kuphela njengoba kwele Zimbabwe amaqembu elokhu engakavunyelwa lokuzilolonga.

Ezemidlalo siziphiwa nguJoseph Njanji
please wait

No media source currently available

0:00 0:02:10 0:00
XS
SM
MD
LG