Kulabantu abangamatshumi amane lanhlanu, 45, ababanjwe umkhuhlane weCovid-19 eZimbabwe izolo kwathi abangamatshumi ayisitshiyagalolunye lantathu, 93, bafunyanwa sebephephile.
Lokhu kukhuphule inani lasebetholakale belesifo lesi selokhu saqhamukayo laya kunkulungwane ezedlula eziyisikhombisa, 7576.
Asebesindile bona bakhwele baya kunkulungwane phose eziyisithupha, 5783.
Abalokhu begula bedlula inkulungwane eyodwa elengxenye, 1569, kuthi asebebhubhile balokhu bengamakhulu amabili alamatshumi amabili lane, 224.
Uhulumende yena uqhubeke eyekethisa imikhawulo yokwenqabela ukumemetheka kwalumkhuhlane njalo izolo ngokuvumela abantu ukusuku edolobhenithize besiya kwelinye idolobho.
Wazise njalo ukuthi amahofisi ogatsha lwendaba zasekhaya asezavulwa ukuze abantu befinyelele inhlelo zencwadi ezifana lama-birth certificates lama-passports.
NgoMvulo hulumende uqhelise isikhathi sokuvulwa lokuvalwa kwamabhizimusi.
Umphathintambo obona ngokwethulwa kwemibiko uNkosikazi Monica Mutsvangwa uthe abalezimota ezithwala abantu abafuna ukuvunyelwa ukuqala umsebenzi njengoba inhambo sezivuliwe phakathi kwamadolobho kumele babhalise kugatsha lwe-transport.
Kwathi ngokuqhamuka kweCovid-19 uhulumende wamisa imitshova yonke lamatekisi ngoMbimbitho njalo wapha inkampani yakhe yodwa, eyeZUPCO, umlandu wokuthwala uzulu.
Abatshayeli bemitshova bathi balamukela ngenjabulo inyathelo lokuthi babhalise ukuze bavunyelwe ukuqala umsebenzi.
Isiphathamandla senkampani yeTrans Bakwena Motorways uMnu Lehlohonolo Mokwena utshele iStudio 7 ukuthi uhulumende kumele aluqhube kuhle uhlelo lolu kungela bandlululo.
