amalinks wokungena

Breaking News

Idale Lomthethwandaba Liloba iWarrant of Arrest Yokubopha Ilunga leMDC Alliance


Umthethwandaba kamantshi koBulawayo uphe imvumo yokuthi amapholisa ayebopha ilunga lebandla leMDC-T elikhokhelwa nguMnu. Nelson Chamisa i-warrant of arrest, ngemva kokwehluleka kwalo ukuza emthethwandaba ngoLwesithathu.

Iwarrant of arrest leyo iphiwe amapholisa ukuthi ayebopha uKunashe Muchemwa ongomunye wabancintisa bedinga ukummela iBulawayo South edale lephalamende emmele umanyano owe MDC Alliance ngemva kokwehluleka kwakhe ukuza edale.

UMuchemwa ngomunye wabantu abane abafunyenwe belecala lokubangela ubudlwangudlwangu ekulwisaneni okwaqhamuke emahofisini awe MDC-T koBulawayo ngoMbimbitho.

Abantu abalitshumi lambili babotshwa ngemva kwales'isehlakalo kodwa abane ababalisa uMuchemwa, uMalandu Ncube, uFelix Mhaka, loEric Gono yibo abafunyenwe belecala ngakho-ke babemele bagwetshwe ngoLwesithathu.

UMantshi Sithembile Ncube uthi ubelungele ukugweba abane laba kodwa akwenzakalanga lokho njengoba uMuchemwa ubengekho.

Igqwetha labane laba, uMnu. Prince Butshe-Dube, okade ekhona edale ucele uxolo esithi ubekhululumisana loMuchemwa isikhathi sonke lesi ngokuza emthethwandaba.

UDube uvumelane lomthethwandaba ukuthi isigwebo sethulwe mhlaka 23 Ncwabakazi kodwa uzimisele ukuthi lesi sigwebo sethulwe ngoLwesine nxa uMuchemwa engatholakala.

UDube uthe ukungezi kukaMuchemwa laye kumangalisile njengoba bebekhulumisana kuhle isikhathi sonke lesi.

UMuchemwa labanye bakhe bebethoniswa bevela ngekhaya ngemva kokuvunyelwa ukuhlawula imali yesibambiuso eye bail.

please wait

No media source currently available

0:00 0:01:53 0:00

Facebook Forum

XS
SM
MD
LG