amalinks wokungena

Breaking News

Ukwebiwa Kwemali yeCDF Kuxabanisa uAttorney General le Anti-Corruption Commission


Sokuqhamuke ukufuthelana phakathi kuka Mnu. Johannes Tomana igqwetha elikhulu lelizwe kwele Zimbabwe lekhomsheni ebona ngokuvimba ukungathembiki, eye Anti-Corruption Commission ngokubotshwa kwamalunga edale lephalamende acatshangelwa ukuthi atshontsha imali yokuthuthukisa izabelo eyeConstituency Development Fund abayinikwa nguhulumende ngomnyaka ka 2010.

UTomana ongu attorney-general uthi kumele kungasabotshwa amanye amalunga edale lephalamende kungakahlolisiswa ukuthi wonke asebenzisa njani imali le.

Umnu. Tomana utshele iStudio 7 ngoLwesithathu ukuthi iAnti Corruption Commission ibophisa amanye amalunga la kodwa amacala abawetheswayo kawaqedakali.

Lokhu sokucunule umgcinisihlalo we Anti-Corruption Commission uMnu. Sternford Chirindo othi ikhomisheni yakhe kayikho phansi kohlangothi luka Mnu. Tomana ngakho-ke izaqhubeka ibophisa amalunga edale lephalamende acatshangelwa ukuthi atshontsha inkulungwane ezingamatshumi amahlanu amadollar eMelika yokuthuthukisa izabelo.

Kumaviki asanda kwedlula kubotshwe amalunga edale lephalamende amane athi uMnu. Albert Mhlanga omele iPumula, uMnu. Marvellous Khumalo (St. Mary’s), uMnu. Franco Ndambakuwa (Magunje) loMnu. Cleopas Machacha (Kariba).

Kubikwa ukuthi kulamalunga edale leCabinet njalo akudale lephalamende akubandla le Zanu PF alakho ukubotshwa ngenxa yokungasebenzisi kahle imali yokuthuthukisa izabelo.

Umnu. Edward Mkhosi omele iMangwe edale lephalamende uthi uTomana akumelanga atshele iAnti Corruption Commission ukuthi isebenze njani.
Umnu. Kucaca Phulu ingcwethi kwezamalungelo oluntu yena uthi uTomana wephula imthetho yelizwe ngakwenzayo.

XS
SM
MD
LG