amalinks wokungena

Breaking News

Sokulokuxokozela Ngesivumelwano Sokwakha Ikolitshi Lebutho eZimbabwe


Uzulu uthukuthele ngesivumelwano se Zimbabwe le China esilotshwe ngoMbimbitho lonyaka saphinda njalo semukelwa kunsukwana ezedluleyo lidale lephalamende.

Isivumelwano lesi sizakwenza ukuthi ilizwe lenelise ukweboleka phose izigidi ezilikhulu zamadola eMelika kwele China yokwakha ikolitshi elikhulu lebutho duzane le Harare.

Umphathintambo wezemali uMnu. Tendai Biti ubikwa emukele isivumelwano lesi esethulwe yiziphathamandla ze China edonswa ngamandla yinkokheli yelizwe njengoba esithi usivume ngenxa yokungafuni ukudiliza ubuhlobo be China le Zimbabwe loba ukuyangisa uhulumende wakhe.

Ele Zimbabwe lizakweboleka imali le ibisisebenzelana lenkampani ye China eye Anhui Foreign Economic Construction Group (Ltd) ezakwakha-ke ikolitshi isebenzisa konke okuvela eChina le Zimbabwe.

Ele Zimbabwe lizabhadala lesisikwelede ngezakuthola ekwenjiweni amadayimana eMarange lapho esebenzelana khona le nkampani ye China iAFECC elamashares ku Anjin Investments elobudlelwano lohulumende.

Ikolitshi leli lizabe lilenhlelo ezitshiyeneyo zamabutho labantu makhaza abazakhethwa libutho ezinjengokufundisa ngezokulwa impi, ozomvikela wesizwe, izifundo ezikhangela ngesimo sobudlelwano lamanye amazwe kanye lokugcina amabizo alabo abazingcwethi kwezempi.

Amanye amalunga edale lephalamende abikwa esefuna ukuthi isivumelwano lesi sihlolisiswe kahle ukwenzela ukuthi uzulu laye athole inzuzo.

Omele iMzilikazi kudale leSenate uMnu. Matson Hlalo uthi idale leli lavuma ngenkani ukuthi isivumelewano lesi sibekhona loba nje abamele amabandla eMovement for Democratic Change bazama ukuthi lesisivumelwano saliwe ngabanye babo.

Ingcwethi kwezombusazwe lezenotho uMnu. Rejoice Ngwenya uthi kulihlazo okwenziwe libandla le ZANU PF lamabandla eMDC ukuthi benze isivumelwano esingasoze sincede abantu makhaza.

XS
SM
MD
LG