amalinks wokungena

Sokulungiselelwa Umsebenzi Wokufaka Impompi Enkulu Yamanzi Esuka eGwayi-Shangani Dam

  • Gibbs Dube

Inkampani ye China okumele ifake impompi enkulu edonsa amanzi esuka edamu le Gwayi-Shangani isiya koBulawayo isiqalisile ukulungiselela umsebenzi lo ozathatha iminyaka emithathu.

Umnu. Samuel Sipepa Nnkomo umphathintambo wezamanzi uthi ezinye izisebenzi ze China Dalian International zikhangelelwe ngoMgqibelo ukuthi zihlangane leziphathamandla zogatsha lwakhe.

Umnu. Nkomo uthi umhlangano lo uzabe ukhangela indlela zokufaka impompi yamanzi le ezawathela edamu elizakwakhiwa duzane le lokitshi le Cowdray Park.

Uthi ibhanga le China Export and Import Bank lizanika inkampani ye China Dalian International izigidi ezingamakhulu ayisitshiyangalombili lamatshumi ayisithupha lane amadollar eMelika – $864 million yokwakha impompi le.

Ibhanga leli lavuma ukuboleka iZimbabwe imali le leyinye njalo yokwakha impompi ezabe isuka eZambezi River isiyafika edamu le Gwayi-Shangani elilokhe lisakhiwa.

Uhlelo lokukha amanzi eZambezi lwacatshangwa ngomnyaka ka 1912 nguhulumende owayekhona ngaleso sikhathi kwaswelakala imali yokulwenza.

IZambezi Water Project icatshangelwa ukuthi ingalethele eleMandebeleni, iNkabazwe le Masvingo intuthuko emangalisayo njengoba kuzabe sokulamanzi angapheliyo.

Umnu. Nkomo uthi inkampani ezafaka impompi le itshengisa amadlabuzane okuqalisa umsebenzi.

XS
SM
MD
LG