Sokusiba sobala ukuthi umnu. Nelson Chamisa nguye ozakhethwa ukukhokhela ibandla leMDC kumhlangano we congress.
Lokhu kulandela imbiko ethi unobhala jikelele webandla, uMnu. Douglas Mwonzora, obecatshangelwa ukuthi uzancintisana lo Chamisa sethe kasekuyi kuncintisa isikhundla sokuba ngumongameli webandla kodwa uzayala elokhu ekusikhundla sikanobhala jikelele.
Kuzigaba eziyisikhombisa esezikhethe amabizo alabo abazanzintisa kumhlangano we congress ozenziwa ngenyanga ezayo egweru igama lika Chamisa yilo eselikhethiwe.
Sikhuluma nje isigaba seManicaland siphakathi kokhetho lolu kodwa imbiko esiyitholileyo ithi bakhona kade bekhonona ngokuthi kuvunyelwe ukukhetha abanye abangela mandla okukhetha.
Lesi yisigaba esakhetha usibalukhulu webandla, uMnu. Douglas Mwonzora kukhetho olwedlulayo ngomnyaka ka 2014 lapho okwamangalisa abanengi ngemva kokuba uMwonzora owayengakhethwanga yizigaba ezilitshumi lanye waphenduka waba nguye owanqoba uChamisa.
Sibuze isiphathamndla sohlangothi lwemdc olwe MDC Veterans Association, uMnu. Swithun Chirooda ukuthi ahamba njani amalungiselelo omhlangano we congress?