Kulomfanekiso we video osuvelile otshengisa owayengu mongameli webandla leMDC-T, uMnu. Morgan Tsvangirai esithi umsekeli wakhe ongathandabuzwayo nguNkosazana Thokozani Khuphe ngoba wakhethwa emhlanganweni we congress.
Ku video le, uTsvangirai uzwakale esithi lanxa engasuka elizweni omele esale ephethe intambo nguNkosazana Khuphe. Kodwa ingcwethi ecubungula ezombusazwe, uMnu. Zenzele Ndebele uthi akusoze kubelula ukuthi ukhuphe asuke esihlalweni asesithethe lanxa abanye besithi akukho emthethweni.
Kunjalo nje, sokusele inyanga ezingafika phose ezine nje kuphela ukuthi kuyiwe kukhetho. Abasekelei be MDCT lezinye izizalwane zeZimbabwe kweleSouth Africa bathi bakhathazeke kakhulu ngombango wezikhundla ebandleni le MDCT.
Lobanje ezinye iziphathamandla zaleli bandla zikhethe uMnu. Nelson Chamisa ukuthi abambe isikhundla somkhokheli waleli bandla, unkosazana Thokozani Khuphe uthi lokhu kuphikisana lesisekelo senhlanganiso yabo esikubeka kucace ukuthi nguye okufanele abambe isikhundla sokukhokhela leli bandla kuze kuqhutshwe umhlangano wokukhetha inkokheli entsha.
Isizalwane seZimbabwe umnumnzana Innocent Fuyana, uthi ukutshaywa kukaMaKhuphe labanye emngcwabeni kamnumnzana Tsvangirai yinto yakuqala okufuze ilungiswe.
Yena ngabe uChamisa usola okuwrongo ngoMaKhuphe bekufanele yena ekhuze abantu bakhe. Ma belensolo belinde iCongress, imeeting ibizobakhona ekhulume lokho akusolayo. UChamisa bekufanele ahloniphe imfa kaTsvangirai.
Ilunga lebandla le MDCT umnumnzana Abshai Ndlovu uthi impendulo yayo yonke li nxushunxushu ekuleli bandla izalanyulwa yikulandela isisekelo salo.
Ngiyacabanga ukuthi bekuzo uniter iparty if balindile laba abafuna ukumchallenger balinda le i extra ordinary Congress. Noma uKhuphe kade eluza abantu bebezobambana ngoba ma uluzile uluzile vele kade kuyiyo indlela ekade ingasolva iproblem ekhona kuMDC.
Elinye ilunga leleli bandla umnumnzana Khaliphani Phugeni uthi ukulwisana okukhona sekulengozi yokukhombisa isithombe seMDC efana leZanu pf endabeni zabantu abafuna ukubusa ngodli.
Into le ilula ukuthi ilungiseke. Iconstitution yethu ithi kungenzakala ukuthi ngeshwa umongameli ashone uVice President okhethwe yiCongress hayi i national council or executive or whatever, nguye obambayo for twelve months.
Obona ngokuqhutshwa kwenhlelo zaleli bandla kweleSouth Africa umnumnzana Trust Ndlovu uthi ithuba lisasekhona elokuthi inkokheli zaleli bandla zigcwalise iphupho likamnumnzana Tsvangirai lokusebenzisa ukhetho oluzayo ukuletha umbuso ohlonipha intando kazulu eZimbabwe.
Singathanda ukuthi bahlangane bahlale etafuleni elilodwa bakwazi ukubonisana. Ngoba phela lento abayenzayo ukuthi kusasa omunye ukhuluma lokhu lamhlanje omunye ukhuluma lokhu abantu abanengi bagcina sebecabanga ukuthi mhlawumbe iparty lena seyihlakazeka ngaphakathi mhlawumbe le party ayisekho.
Lobanje ilanga lokhetho lingakamenyezelwa, kukhangelelwe ukuthi lubekhona enyangeni ezinhlanu ezizayo. Abasemazweni labake bathi nxa ingxabanole ingaqhubekela phambili iZanu PF ingalunqoba lolukhetho izitshayela umlozwi.