amalinks wokungena

Breaking News

Sokuvuselelwa iHighlanders Rugby Club


Abadlali abadlalela iqembu le Highlanders Rugby Football Club kudala sebelivuselela iqembu leli.
Abadlali abadlalela iqembu le Highlanders Rugby Football Club kudala sebelivuselela iqembu leli.

Kuqhutshwa imizamo yokuvuselela iqembu le Highlanders Rugby Football Club.

Abadlali abadlalela iqembu le Highlanders Rugby Football Club kudala bahlangene ekupheleni komnyaka ophelileyo ngosuku lwe Unity Day lapho abadlale umdlalo leqembu le Western Panthers enkundleni ye Hartsfield koBulawayo.

Lababadlali bebezibiza ngegama elithi Highlanders Legends njalo umongameli we Zimbabwe Rugby Union uNyararai Sibanda, laye owadlalela leliqembu, uthe zinengi inhlelo ezizaqhutshwa yileliqembu ezigoqela ukuphathisa iqembu le Western Panthers, lona elalisaziwa njenge Highlanders Rugby Football Club kudala.

“Siqalise iqembu leli ngo1982 njalo besihlangene ukuba sikhumbuzane ngamalanga ayizolo lokuthi sitshengisane ukuba leliqembu elokuqala elabensundu lokhu lisekhona lamhlanje njalo sikhona sizaliqinisa thina. Bonke laba obabona lapha balesifiso sokuphathisa laba bafana abasakhulayo.”

Iqembu leli ebeselibizwa ngegama elithiwa yiWestern Panthers lisungulwe ngomnyaka ka 1982 ngemva kokuba abalUngu ababevela kwamanye amazwe bekuleli ukuzofundisa ezikolo ezibalisa iLuveve High, Ihlathi, iMsitheli, iMpopoma kanye le Njube bebumbe iqembu le Bulawayo Rhinos elalidlalelwa ngabadlali abasebeqede isikolo.

Leligama lintshintshe ngemva kokuba iqembu le Rhinos livakatshele edolobheni le Gweru lathola kulamabhakane ayesithi baliqembu lebutho ele Black Rhinos okuyinto abangayithandanga basebeqala ukuzibiza ngegama elithi Western Surburbs.

Ngomnyaka ka 1988 leliqembu libe yingxenye ye Highlanders Sports Association ngemva kokucelwa lilunga le Highlanders uMalcom King laguqula igama lalo laba yi Highlanders Rugby Football Club.

Kuthe sekudlule phose iminyaka elitshumi iqembu leli liqale ukudlala liyi Highlanders lenelise ukuphatheka kumncintiswano we Intercity obungenwa ngamaqembu amakhulu elizweni ngomnyaka ka 1998.

Umkhokheli wenhlanganiso ye Matabeleland Rugby Football Board uThulani Tabulawa, laye owadlalela iqembu le Highlanders, uthi ngomnyaka ka 2002 igama leqembu liguqukile njalo ngemva kokuba abanye abadlali bekhonone ngokungatholi usizo oluvela ekubizweni kwabo ngegama elithi Highlanders.

“Abadlali laba abancane ababengazi imbali yethu bathi kabatholi lutho kuHighlanders asazi kumbe babecabanga ukuthi bazathola usekelo oluvela kwabanye abantu ngoba babesithi igama elithi Highlanders libavalela amasponsor.

“Sabavumela ukuba besebenzise imbala yeqembu, iconstitution yethu kanye lokuthi bethathe indawo yethu kumncintiswano we Intercity.”

Kulezinsuku iqembu leli selibizwa ngokuthi yiHighlanders Panthers njalo ophethe isikhundla sikaMgcinisihlalo weqembu le Highlanders uModern Ngwenya ubengumhlonitshwa kumbuthano we Highlanders Legends ekupheleni kwanyakenye.

USibanda uthe lonyaka bazaqhuba inhlelo ezimbalwa ezizaphathisa ukuba umdlalo werugby uthuthuke elizweni.

“Sesizaqalisa ukubhalelelana lamanye ama legends sibe sesisethekelela khona siding ukuba singaphathisa njani laba bafana abadlalayo labaphethe izikhundla.”

Abanye abadlali abaduma bedlala umdlalo we rugby abake badlalela iqembu leli ngabagoqela uVictor Olonga, uZivanai Dzinomurumbi, uArnold Takawira, uSlater Ndlovu, uArthur Mathe kanye lo Gilbert Nyamutsamba.

XS
SM
MD
LG