amalinks wokungena

Breaking News

Soluphanyekwa eHigh Court Udaba Lokususwa Esihlalweni KukaNduna Ndiweni


Induna uFelix Nhlanhlayamangwe Ndiweni

Amapholisa ahlomileyo abikwa eye emzini kaNduna Felix Nhlanhlayamangwe Ndiweni eNtabazinduna elandela isiqondiso sencwadi elotshwe nguMongameli Emmerson Mnangagwa sokuyathatha impahla yonke kahulumende esezandleni zeNduna kodwa ehluleka ngoba engekho ezweni okwamanje.

Igqwetha lakhe uMnu Dumisani Dube oweMathonsi Ncube Law Chambers, uchasisa kabanzi ngamalungiselelo okukhweza loludaba emthethwandaba waphezulu oweBulawayo High Court.

''Ngamafitshane silungisa amaphepha ukuba siye edale leHigh Court KoBulawayo ukuyamelana lokuxotshwa kukaNduna uNhlanhlayamangwe Ndiweni. Ngokubona kwethu umthunameli welizwe leChiefs Council bephule isisekelo sombuso njalo induna yabekwa embusweni no 2014, uma elecala bekumele athonisiswe kodwa akwenzakalanga lokho kubonakale incwadi ebulenjini yokuthiusexotshiwe. Sizesathola lincwadi lamhlanje kuDA eMguza njalo lamapholisa ahlomileyo aseke aphenduka emzini wenduna belandela isiqondiso sencwadi kaMongameli. Ngalesi isikhathi akukabi lokukhulumisana leChiefs Council loNdiweni njalo uMdeni wakoNdiweni bathi uNduna Felix Ndiweni yiyo iNduna yabo.''

Umdeni KaNdiweni ubikwa uzondiswe ngokwenziwe nguhulumende obambisana lamalunga ekhansili yezinduna ukumsusa esikhundleni.

UMnu. Wilson Bancinyane Ndiweni, isikhulumeli somdeni wakhe uchasisa abakwenzayo.

''Asikabi lalutho manje kodwa sike saxoxaxoxa njengemuli njalo umfana akekho mhlawumbe engabuya kusasa njalo amapholisa ahlomileyo aseke ayafika eNtabazinduna belanda impahla kahulumende.''

UMnu. Mbuso Fuzwayo, unobhala jikelele weqembu elilwela amalungelo oluntu ele lbhetshu likaZulu, usola okwenziwa nguhulumende.

''Kulusizi okwehlele iNduna yeNhlambabaloyi ungakhangela ukuba konke kwenziwe kweyanywe kwezepolitiki ngoba iminyaka yonke leyi bebethuleleni. Iziphathamandla zeZANU zilesandla kulokhu.''

Kusenjalo, abantu abasekela induna yeNtabazinduna, sebebumbe isikhwama sokubuthanisa imali enkundleni yebulenjini eseGofundme. Sokubuthaniswe inkulungwane ezedlula ezine lengxenye - $4,600.

UMnu. Nkululeko Mbonisi Fuyane, obumbe isikhwama lesi esiqhutshwa ngaphansi kwesihloko esithi #ISupportChiefNdiweni, uthi kuyathokozisa ukubona abantu abanengi befaka imali esikhwameni lesi esisungulwe izolo.

Banengi njalo abasekela uNdiweni ngendlela ezitshiyeneyo obagoqela ezabelweni zeMatabeleland leNkabazwe asebedinga impahla lokudla kokunika umdeni wenduna eyaziwa ngokuthi yinduna yabantu.

Bakhanya bebanengi kakhulu abamjabulelayo uNdiweni ngenxa yokuthi bathi ulwela ilungelo labantu bonke eZimbabwe.

please wait

No media source currently available

0:00 0:03:33 0:00

Facebook Forum

XS
SM
MD
LG