amalinks wokungena

Breaking News

Sweswe: Badlale Kuhle Abafana beFC Platinum Emdlalweni leAl Ahly


Umsekeli kamqeqetshi weqembu lenguqu ele FC PlatinumLizwe Sweswe

Iqembu le FC Platinum lithole umklomelo walo owakuqala ngemva kokuba ngutshiki lobhanqa 1 ka 1 leqembu le Al Ahly elakwele Egypt ngoMgqibelo owedluleyo.

Bekungumdlalo walo wesine kumncintiswano we Total CAF Champions League iqembu le FC Platinum njalo belinqotshwe kuyo yonke imidlalo emithathu ebeliyidlale phambilini.

Leliqembu lihlohlelwe ngumgadli walo omutsha uStanley Ngala yena obedlalela iqembu le Manica Diamonds nyakenye njalo uthengwe kuqembu elifanayo ndawonye lomdlali wenkabeni yenkundla uLast Jesi laye odlale kuhle kakhulu ngoMgqibelo.

Umsekeli kamqeqetshi weqembu le FC Platinum uLizwe Sweswe uthe abafana bakhe badlale kuhle kakhulu ngoMgqibelo njalo indlela abadlale ngayo itshengise ingqubela phambili enkulu nxa kulinganiswa lemidlalo yabo eyakuqala.

“Ngokubona kwami abafana badlale kuhle kakhulu. Umehluko kube yikuhlohla ngoba besidlala kuhle kodwa singenelisi ukuhlohla yikho libona sidinge abadlali abatsha njalo ngenhlanhla enkulu omunye wabo uhle wafika wahlohla,” kutsho uSweswe.

Impumela yangoMgqibelo itsho ukuba amathuba eqembu le FC Platinum awokudlulela kusigaba esilandelayo awasekho ngoba lisalelwe yimidlalo emibili kusibaya sika Group B okutsho ukuba lanxa lingaze linqobe lingenelisa ukubuthelela imiklomelo eyisikhombisa kuphela.

Komunye umdlalo wesibaya sika Group B odlalwe ngempelaviki eyedluleyo iqembu le Al Hilal elakwele Sudan linqotshwe nge 1 - 2 ngele Etoile du Sahel elakwele Tunisia.

Limpumela itshiye Iqembu le Etoile Sportive du Sahel lihlezi phezu kwengalane lilemiklomelo eyithoba munwe munye ngemva kwemidlalo emine.

Endaweni yesibili kuleqembu le Al Ahly lona elilemiklomelo eyisikhombisa ngemva kokudlala imidlalo emine kuthi ele Al Hilal lihlezi endaweni yesithathu lilemiklomelo eyisithupha lalo ngemva kokudlala imidlalo emine.

Imidlalo elandelayo eyesigaba sika Group B izadlalwa inyanga kaZibandlela isisiyafika emaphethelweni lapho iqembu le Al Ahly elizemukela khona ele Etoile Sportive du Sahel kungoLwesihlanu mhla zingamatshumi amabili lane kuthi ngoMgqibelo mhla zingamatshumi amabili lanhlanu iqembu le FC Platinum lizangqikilana lele Al Hilal.

ULizwe Sweswe nguye obeziphethe esidukwini ngoMgqibelo owedluleyo kodwa kumidlalo ezayo iqembu le FC Platinum lizabe seliqeqetshwa ngumqeqetshi oyisizalwane selizwe lase Holland uHendrikus Pieter de Jong yena obesebenzela iqembu le Highlanders nyakenye.

please wait

No media source currently available

0:00 0:02:23 0:00

Facebook Forum

XS
SM
MD
LG