amalinks wokungena

Breaking News

Omele eleZimbabwe Kwele Melika Uthi Bahlolisisa Okwenziwa Ngamanye Amazwe Okumayelana leDiaspora Vote


Omele eleZimbabwe kwele Melika uthi uhulumende wakhe uhlolisisa okwenziwa ngamanye amazwe avumela izizalwane zawo ukuba zivote zisemazweni atshiyeneyo. Wethule amazwi la ngesikhathi bekhala abadabuka eZimbabwe abafisa ukuba bevote kukhetho besemazweni abahlala khona.

Abadabuka eZimbabwe abahlala endaweni ezitshiyeneyo kwele Melika izolo benze umhlangano lomele ilizwe labo kwele Melika, uAmbassador Tedious Chifamba, eSilver Spring, esabelweni seMaryland.

Ekhuluma ngezikhalazo zezilwane zeZimbabwe ezihlala kwamanye amazwe, ezigoqela ukuba bevote kukhetho lwelizwe besemazweni atshiyeneyo, i-diaspora vote, uChifamba uthe uhulumende kaMongameli Emmerson Mnangagwa usebenza gadalala ukuze alungise izikhalazo zabahlala emazweni.

“Uhulumende uzama ukuvuselela okumumethwe kugwalo lweDiaspora Policy. Sizama ukuba abantu baphatheke kunhlelo zokuvuselela ilizwe. Kulodaba labafuna ukuba yizizalwane zamazwe atshiyeneyo olwe dual citizenship, udaba loluvota olwe diaspora vote kanye lokutshala imali eZimbabwe. Bakhona abathakazelela ukuvota besemazweni atshiyeneyo. Sizama ukufunda kulokhu okwenziwa ngamanye amazwe ukuze senze kahle lokhu okuthiwa yi-diaspora vote.”

Ekhuluma ngokuhlangana labadabuka eZimbabwe eSilver Spring, uChifamba, osanda kukhethwa nguhulumende ukuba amele ilizwe kwele Melika, uthe kuyajabulisa ukubona okwenziwa ngabahlala elizweni leli.

“Lokhu ngiyakuthakazelela kakhulu. Kuhle kakhulu.”

Ekhuluma emhlanganweni lo, uNkosikazi Dorcas Hove, obemmele izizalwane zeZimbabwe ezihlala kwele Melika, uthe ulethemba lokuthi uChifamba uzasebenza gadalala ukubona ukuthi ubudlelwano bakhe labadabuka eZimbabwe buzaqhubekela phambili.

“Sithemba ukuthi lizasihlanganisa ngobuhle. Uma sihlangana kukuhle njenganamhlanje siyajabula. Lapho esiba lenkinga khona sithemba ukuthi Ambassador uzabe ukhona ukuthi usisekele.”

UNkosikazi Idah Maindidze, omunye obesemhlanganweni lo, usekela okukhulunywa nguNkosikazi Hove.

Kulabanye abadabuka eZimbabwe abahlala kwele Melika abatshengisele eNew York izolo ngesikhathi uChifamba esenza umhlangano labanye babo eSilver Spring. Bakhala ngokungavunyelwa ukuvota kukhetho besemazweni atshiyeneyo.

Uhulumende uthi okwamanje kenelisi ukuvula indawo zokuvota emazweni ngenxa yezijeziso zenotho ezafakelwa abalandeli bebandla leZanu PF njalo lemithetho engavumeli ukuba abasemazweni bevote belapho abahlala khona.

Udaba Esilethulwe NguMike Hove
please wait

No media source currently available

0:00 0:03:03 0:00


Facebook Forum

XS
SM
MD
LG