Umkhokheli webandla lePeople’s Democratic Party uMnu. Tendai Biti, oyisiphathamandla somanyano weMDC Alliance utshele umthethwandaba kamantshi eHarare ngoLwesihlanu ukuthi awulamandla owokumthonisisa icala aletheswayo ngoba kufanele abese Zambia lapho owayedinga khona ubuphepheli.
UMnu. Biti wetheswa icala lokutshotshozela udlakela ngemva kokhetho kanye lokumemezela impumela yalo, ikhomishini elelungelo lokwenzenjalo, eyeZimbabwe Electoral Commission ingakakwenzi lokhu. Kodwa igqwetha elimmelayo uMnu. Aleck Muchadehama uthi uMnu. Biti uyaliphika lelicala.
“Iziphathamandla zikahulumende we Zambia zavumelana lomunye wazo weZimbabwe ukubuyisela uMnu. Biti emuva ngokungekho emthethweni. Ngalokhu, akufanelanga abeseZimbabwe, kumbe amiswe phambi kwalumthethwandaba. Kufanele abeselizweni leZambia, lona elingalandelanga umthetho wamazwe omhlaba ngokumxotsha,” kugcizelela uMnu. Muchadehama.
Wengezelele wathi bazaphindela emthethwandaba kamantshi ngoLwesithathu kuviki ezayo, bezokuzwa ukuthi wamukela njani amazwi kaMnu. Biti:
“Umthethwabanda uthi uzadingisisa ngaloludaba ukwenzela ukuthi ubekwazi ukuthi ngempela uMnu. Biti akufanelanga athonisiswe emthethwandaba weZimbabwe.”
UMnu. Biti wabalekela kweleZambia ukuyadinga ubuphepheli esithi wesabela impilo yakhe ngoba kulabantu abadubule emoteni yakhe labazame ukumthumba.
Ngakwelinye icele, igqwetha, uMnu. Nqobizitha Mlilo, owayehambe loMnu. Biti eZambia utshele iStudio 7 ukuthi ukhululiwe ngesibambiso se bail ngumthethwandaba kamantshi eKaroi ngoLwesihlanu labanye bakhe ababalisa uMnu. Clever Rambanapasi loMnu. Tawanda Blessing. Abathathu laba betheswa icala lokwephula imithetho ephathelane lokuchapha umngcele welizwe ngokungekho emthethweni.
