Uhulumende wakwele Melika uthi imithetho yezomnothi emibi, inkohlakalo lokwephulwa kwamalungelo oluntu eZimbabwe yikho osekuwise umnotho welizwe hatshi amanga akhulunywa nguhulumende othi lokhu kubangelwa yizijeziso zenotho ezafakelwa inkokheli yebandla leZanu PF ngamazwe entshonalanga.
Umsekeli kamphathintambo wogatsha olubona ngendaba zezwekazi leAfrica, uMnu. Tibor Nagy, utshele iStudio 7 ukuthi inkulumo yokuthi iZimbabwe njengelizwe lafakelwa izijeziso zomnotho ngamanga-nje akhandwe nguhulumende kaMongameli Emmerson Mnangagwa.
Uthi iqiniso yikuthi kulabantu lamankampani edlula ikhulu lamatshumi amane kuphela (141) abafakelwe lezi zijeziso. Uthi izijeziso lezi azivimbeli amankampani eAmerica ukuqhuba ezamabhizimusi lamanye wonke angekho kunani leli elethulelwe izijeziso.
Uthi-ke okwenqabela amankampani eMelika ukusungula amabhizimusi eZimbabwe yimithetho engakhuthazi ukusungulwa kwamabhizimusi, inkohlakalo yeziphathamandla lezisebenzi zikahulumende kanye lokwephulwa kwamalungelo oluntu.
Kodwa-ke umgcinisihlalo webandla leZanu PF kwele South Africa, uMnu. Kenneth Mandaza, uthi lokhu okushiwo yiMelika yikucatsha ngomunwe.
“Longumbononje weMelika wokucatsha ngomunwe. Iqiniso yikuthi inengi labeZimbabwe bathwele nzima ngalez’iijeziso zomnotho.”
Isikhulumeli sebandla leZapu, uMnu. Iphithule Maphosa, uthi kuyabethusa ukuthi yindaba iZanu PF leSouthern African Development Community besenza sengathi abaliboni iqiniso elisegcekeni kanje. “
Kuyasimangazanje lamhlanje ma bezasukumela abantu aba less than 200 ukuthi kube yibo abahleli kuhle, besuselwe izijeziso lezo abazifakelwayo. Kuyaconfirmer sobala ukuthi iSADC kutsho ukuthi yiclub nje yama dictators, yiclub yabahuquluzi, yiclub yabancindezeli abalandaba le welfare of millions of citizens of ama member countries.”
UNagy uthi uhulumende wakhe kudala wakucacisa okufuze uhulumende weZimbabwe akwenze ukuze amankampani ethulelwe izijeziso zomnotho zisuzwe.
Uthi kufanele kuguquke ezombusazwe ezihlasela labo abalemibono ehlukileyo kulekahulumende, kuhlonitshwe amalungelo oluntu lamalungelo okwethulwa kwemibono lemibiko, kulungiswe imithetho yezokhetho kufakwe ekhokhelela ekhethweni olukhululekileyo njalo lungelakuqilibezela, kubekwe obala indlela okuqhutshwe ngayo uhlelo lokwaba umhlabathi njalo kubotshwe bonke abaphatheke emisebenzini yenkohlakalo.
