amalinks wokungena

Breaking News

Uhulumende Uhlolisisa Umonakalo Wezulu Lesikhukhula ETsholotsho


Umphathintambo Wezokuhambisa uMnu. Obert Mpofu

Lokhu kulandela ukukhonona kwenhlanganiso ezizimeleyo kanye lamabandla aphikisayo eMatabeleland ngokuthi uhulumende ubengancedisi abantu bakulesisigaba kodwa enakekela abalohlupho olufanayo eMasvingo.

Iqula lekhomithi esanda ukubunjwa eyabaphathintambo bakahulumende abedlula itshumi lanye lamuhla lihlolisise izigaba ezahlaselwa lizulu lesikhukhula eladilizela abantu izindlu labancedisa ngokudla kanye lezembatho.

Iqula leli belikhokhelwa ngumgcinisihlalo weZanu PF uMnu. Simon Khaya-Moyo lomphathintambo wezabelo uMnu. Ignatious Chombo labanye bakhe bengatsha zemota zokuhambisa kanye lokwethulwa kwembiko oMnu. Obert Mpofu loMnu. Jonathan Moyo.

Abanye abakuleliqula bekungabaphathintambo ababona ngezokulima, ezempilakahle, okwenzakala elizweni, ezomvikela, kanye lenhlelo zamanzi. Ngokulandelana kwabo ngoMnumzana. Joseph Made, David Parirenyatwa, Kembo Mohadi, Sydney Sekeramai kanye loMnu. Saviour Kasukuwere
Indawo ezahlaselwa lizulu leli eTsholotsho zigoqela i Butabubili, Gariya, Dzokotsi, Mtshina, Sandawana, Sasedza, Kalave, Mahlaba, Mapili Mahlosi, Mbanyana, Matupula, Mbamba, le Jimila lapho okuhlala khona inengi lamasili.

Amanzi kulindawo abangelwa yikuchitheka kwedamu le Gariya lemfula uGwayi loZumbani.

Inhlanganiso ezizimeleyo kanye lamabandla aphikisayo eMatabeleland zisanda ukukhonona ngokuthi uhulumende ubengancedisi abantu bakulesisigaba abahlaselwa yilelizulu kodwa enakekela abalohlupho olufanayo eMasvingo lapho okwadabuka idamu leTokwe Mukosi, latshiya inkulungwane lenkulungwane zabantu zingelandawo yokuhlala.

Kodwa uMnu. Obert Mpofu ukulandule lokhu, esithi ikhomithi yakhe ihlolisisa izigaba zonke zelizwe ngaloludaba.

please wait

No media source currently available

0:00 0:02:21 0:00
Lapho esitholakala khona

Kusenjalo, uNkosikazi Roselyn Siphepha omela I-Tsholotsho North edale lephalamende utshele uSithandekile Mhlanga weStudio 7 ukuthi kanxuswanga kulumbuthano yena kunguye obengatshengisa ikhomithi le okufuna ukuguqulwa.

please wait

No media source currently available

0:00 0:02:17 0:00
Lapho esitholakala khona
XS
SM
MD
LG