Umkhankaso kaMnu. Joe Biden owokudinga usekelo lokuncintisa kukhetho lokudinga umongameli weMelika ngomnyaka ka 2020 lubikwa luqhubeka kuhle ngoba uphenyo olwenziweyo lukhomba ukuthi nguye okhokhela abanye bakhe bebandla eliphikisayo elamaDemocrats, ngesilinganiso sokungamatshumi amathathu lasitshiyagalolunye ekhulwini-39 percent.
UMnu. Biden, owayengumsekeli kamongameli Barack Obama, ulandelwa ngu senator Bernie Sanders weVermont olesilinganiso sokulitshumi lanhlanu ekhulwini-15 percent. Engaphumelela kukhetho lwama primary elections alelibandla uMnu. Biden, uzancintisana lomongameli donald trump owebandla lamarepublicans, yena oyabe esencintisela ukubusa okwesigaba sesibili sombuso wakhe-isecond term.
Abanye abancintisayo ngusenator Elizabeth Warren weMassachusetts, usodolobho weIndiana uMnu. Pete Buttigie, uSenator Kamala Harrie we, kanye lelunga ledale lecongress uMnu. Beto O’Rourke.
Emhlanganweni wakhe we rally ngoMvulo, uMnu. Biden ukubeke sobala ukuthi umkhankaso wakhe uqophe ukutshengisa ukuthi umongameli Donald Trump uxabanisa abantu elizweni, ngakho yena ufuna ukubamanyanisa ukwenzela ukuqinisa ilizwe.
Umongameli Trump useke wachothoza uMnu. Biden ebulenjini be twitter, esithi ulivila nje njalo ngu “Sleepy Joe.” Kambe bengadibana bobabili kungazala nkomoni? Kuhlandla lwethu lwesithathu esilethulela lona emsakazweni weStudio 7, namuhla sihlaziya loludaba, silengcwethi ecubungula ezombusazwe uMnu. Dumaphi Mema ngaloludaba.
