UMongameli weMelika, uMnu Joe Biden, ukhulumisane losowabo weRussia, uMnu Vladimir Putin, ngocingo izolo wamxwayisa ukuthi engalokothi athumbe eleUkrane.
UBiden uxwayise uPutin ukuthi atshiyane lomcabango wokungena ngamandla kulelilizwe ngemva kokuthumela amabutho akhe emngceleni weUkraine, kubike isikhulumeli sikaBiden, uNkosikazi Jen Psaki.
Ukukhulumisana kwababili laba ngokwesibili kulinyanga njalo kuza ngesikhathi kulokufuthekana okukhulu phakathi kweMelika ibambene labangane bayo abakumanyano weNato leleRussia phezu kwaloludaba.
UBiden uxwayise njalo uPutin ukuthi engavele engene ngamandla kweleUkraine amazwe angentshonalanga azakwethesa ilizwe lakhe izijeziso zenotho ezizalimaza ilizwe lakhe aphinde alithathele lamanye amanyathelo.
Umcebisi kaPutin uMnu Yury Ushakov utshele intathelizindaba ukuthi bakhangelele ukuqhubeka bekhulumisana leMelika ukuze kube lesisombululo, kubike iAFP.
Amazwe womabili akhangelelwe ukusunugula inkulumo ngoZibandlela mhlaka 10 eGeneva phezu kwaloludaba.
EleRussia lithi lilakho ukungena kweleUkraine ngodlakela nxa umanyano weNATO, wona okhokhelwa yiMelika ungavumela eleUkraine ukuba lilunga lawo.
Ithi njalo iNATO akumelanga iqhele ingene emazweni asenzikini lasempumalanga kwezwekazi leEurope ngoba lokho kubangela ukuthi ingazizwa ivikelekile.
Intathelizindaba, uMnu Simbarashe Nembaware utshele iStudio 7 ukuthi kaboni inkulumo zayizolo zisenelisa ukuqeda ukufuthelana phakathi kweMelika leRussia phezu kodaba lweUkraine.
