Umphathintambo wezemali njalo engunobhala jikelele weMDC ekhokhelwa nguMnu Morgan Tsvangirai, uMnu Tendai Biti uthi owake waba ngumholi webutho uSolomon Mujuru, obhubhe ngeviki edluleyo engaba ebulewe ngabanye bakhe abakuZanu PF.
UMujuru utshele ekamelweni lokulala epulazini lakhe duzane ledolobho leHarare ngoMvulo odluleyo waphela waba ngumlotha. Imfa yakhe iqhubeka iyinsindababaphenduli emphakathini uzulu ebuzana imibuzo etshiyeneyo.
Ekhuluma emhlanganweni weMDC obuseMutare ngeSonto, uBiti uthe kuyaziwa ukuthi ibandla leZanu PF libandla elisebenzisa kakhulu udlakela. Wengeze wathi lelibandla likhanya selisebenzisa "ukuwosa" abantu njengendlela yokujezisa izitha zalo.
Lanxa uBiti ubekhanya egudla iguma lapha, kusobala ukuthi inkulumo yakhe ngokosiwa kwabantu ibiqondane lokutsha kukaMujuru. Ampholisa wona athi aphakathi kokucwayisisa loludaba.
Ekhuluma leStudio 7, uMnu Rugabe Gumbo, oyisikhulumeli seZanu PF usole kakhulu amazwi kaBiti esithi uzulu kumele amelele impumela yocwaningo lwamapholisa.
Isikhulumeli seZapu uMnu Methuseli Moyo uthe amapholisa kumele azise umphakathi ngokuphangisa ukuthi uMujuru ufele engozini yomlilo nje kumbe ubulewe ngabantu abaqale lumlilo ngabomo.
