amalinks wokungena

Breaking News

UBlatter Utshiya Isikhundla Sokukhokhela Inhlanganiso yeFIFA


Umkhokheli wenhlanganiso eqondisa inguqu emhlabeni jikelele eye FIFA Umnu. Sepp Blatter

Umnumzana Sepp Blatter, umongameli wenhlanganiso eqondisa umdlalo wenguqu emhlabeni jikelele eye FIFA, umangalise abanengi ngokubika ukuba usetshiya lesi sikhundla, ngoLwesibili engela lasizatho asinikileyo, ngesikhathi linhlanganiso iphakathi kokucubungulwa ngodaba lokutshaphazwa kwemali lokungathembeki.

UBlatter ubesanda kukhethwa ukuthi akhokhele linhlanganiso okwehlandla lesihlanu ngoLwesihlanu olwedluleyo. Ukuthi kwenzakaleni phakathi kwensuku ezine ezedluleyo okumenze wakhetha ukutshiya isikhundla lesi akwaziwa ngoba ehle wathi kakukhethwe omunye ozathatha lesi sikhundla kodwa uzaqhubeka ephethe intambo kuze kukhethwe omunye umongameli.

Lokhu kubikwa kulakho ukuthatha inyanga ezithile okubikwa kungenzakala engxenye phakathi kukaMpalakazi lonyaka loMbimbitho womnyaka ozayo ka 2016.

Umkhokheli weFIFA oleminyaka phose engamatshumi athoba minwe mbili yokuzalwa umangalise umhlaba jikelele ngombiko wakhe wokutshiya lesi sikhundla emhlanganweni lentathelizindaba owenzelwe eZurich, yena isikhathi sonke lesi ube esithi laloba lihlanganiso icutshungulwa ngamacala athile akayi kutshiya isikhundla.

Ngemva kokuba esekhethiwe ngoLwesihlanu uBlatter uthembise ukusebenza gadalala ukulungisisa zonke inking ezehlele iFIFA. Ngakhoke wethuse abantu abanengi emhlabeni jikelele ngokuvuka ngoLwesibili esebika ukuthi usesuka kulesi sikhundla.

XS
SM
MD
LG