Owake waba ngumkhokheli weZimbabwe Football Association (ZIFA) njalo osekhokhela inhlanganiso yabemba amatshe aligugu, iZimbabwe Miners Federation (ZMF), uNkosazana Henrietta Rushwaya ubotshiwe ngoMvulo esetheswa icala lokuzama ukuphuma elizweni legolide elilesisindo se6kg ngaphandle komthetho.
Amapholisa athi abophe uRushwaya ngesikhathi ezama ukugada indizamtshina egcekeni leRobert Gabriel Mugabe Airport, eHarare, elubhekise eDubai lapho acatshangelwa ukuthi ubesiyathengisa khona leligolide.
Inkundla yeZimLive ithi igolide leli belizamtholisa imali engangeUS$366,000.
UNkosazana Rushwaya ukhangelelwe ukumiswa emthethwandaba ngoLwesibili lapho azabhekane khona lecala lokwephula umthetho weCustoms and Excise Act ngokuzama ukuphuma legolide engela layisensi njalo engabhadalanga imithelo efunakalayo.
Uhulumende uhlezi ekhala ngokuthi ulahlekelwa yizigidi lezigidi zemali ngomnyaka ngenxa yezigilamkhuba eziphula elizweni lamatshe aligugu ngaphandle komthetho zisiyawathengisa kwamanye amazwe.