Unobhala jikelele wenhlanganiso yabalwa impi yenkululeko iZimbabwe National Liberation War Veterans Association, uMnu Victor Matemadanda ubotshiwe ngoLwesithathu esetheswa icala lokuthuka uMongameli Mugabe.
Igqwetha lakhe uMnu Doug Coltart uthi uMatemadanda ubotshwe ngesikhathi ezinikela emapholiseni eHarare ngemva kokubizwa ngoMvulo ukuthi aze enkambeni.
UMnu Coltart wengeze wathi uMatemadanda ulakho ukumiswa emthethwandaba ngoLwesine kumbe ngoLwesihlanu.
UMatemadanda ngomunye wabantu abaxotshwa kubandla leZanu PF besetheswa icala lokuzama ukugenqula umbuso kaMugabe.
Ukubotshwa kwakhe kuphehle imbono etshiyeneyo kuzulu, abanye bemzwela usizi kanti abanye njalo besithi “tshana nyamazana yami.”
Abalwa impi yenkululeko abeyamele kucele leZanu PF badume ngokuhlukuluza uzulu ngokumethusela lokumbamba ngamandla ukuthi asekele lelibandla kanye lokulivotela.
Kodwa omunye wabalwa impi yenkululeko uMnu Max Mnkandla uvikele uMatemadanda esithi kazange ephatheke ekwephuleni amalungelo oluntu.
