Inhlanganiso ye Commercial Famers’ Union ithi sekuqhamuke ubudlwangudlwangu njalo emapulazini abamhlophe osebubangele ukuthi abekade bekhangelelwe ukuphathisa ngemali badedele emuva.
Linhlanganiso ithi ezokulima elizweni jikelele zifuna imali engangamabillion edlula amabili amadollar-$2.5 billion ngomnyaka kodwa ngokoma komumo wezenotho bebekhangelele ukuthi limali yehle iye kuzigidi ezingamakhulu amathathu zamadollar-$300million ivela kumabhanga, ingatsha zikahulumende kunye labaphathisayo abakwamanye amazwe kodwa limali isikhangelelwe ukwehla iye kuzigidi ezingamatshumi amabili zamadollar-$20 million kuphela.
I CFU ithi kunyanga ezedluleyo sekuthunjwe amapulazi amanengi kwabulawa abalimi ababili abanye basala belamangxeba.
Umongameli wenhlanganiso le, uMnu. Charles Taffs uthi abakwamanye amazwe kade bephathisa ngemali bathi kabasafuni ngoba udubo lweZimbabwe ayisilo lokuswelakala kwezulu nje kuphela kodwa ngolubangelwa nguhulumende.
Umsekeli kamongemeli weCFU uMnu. Peter Steyl utshele iStudio 7 ukuthi sebekhweze udaba lolu kunhloko kahulumende, uMnu. Morgan Tsvangirai. UMnu. Peter Steyl ngumsekeli kamongameli we Commerical Farmers’ Union. Ingcwethi kwezokulima, uMnu. Mandla Nkomo utshele uChris Gande weStudio 7 ukuthi kuyamangalisa ukuthi kuba lobudlwangudlwangu emapulazini ngesikhathi izulu selisewule.