UBulawayo usele ebambe owanga[hansi ngendlela ekhwezwe ngayo intengo yamafutha epethulu emini wona evuke elentengo yayizolo. Inengi lithi lokhu kuzabangela ukukhuphuka kwentengo yemphahla etshiyeneyo lokudla.
Uhlangothi olubona ngezamandla omlilo olwe Zimbabwe Energy Regulatory Authority (ZERA) lwethule umbiko wesilinganiso sokukhwezwa kwentengo yalamafutha ezimotha. Iphethulu ikwezwe ngesilinganiso sokungamatshumi amane lasithupha ekhulwini-46%, isuka kumadola edlula kancane amathathu isiya kumadola phose amahlanu amaRTGS.
Osaphethe isikhundla somqondisi we ZERA, uMnu. Edinton Mazambani, uthi abanini bamagalaji bakhululekile ukuthengisa ngentengo ephansi kulaleyo emenyezelweyo.
Ukuqonga kwentengo yamafutha ezimotha kuza ngesikhathi ibhanga elikhulu lesizwe ele Reserve Bank of Zimbabwe selikhiphe eyinye yemali ebingezelelwa nguhulumende ukuncedisa labo abathenga lokuthengisa amafutha ezimotha ukuze intengo yawo ingakhuphulwa kakhulu.
Usomabhizimusi wako Bulawayo okumsebenzi wokuthwalwa kwemphahla labantu uMnu. Matthew Sibanda, owe Bhubesi Transport, uchasisa ukuthi uBulawayo wamukele njani isaziso sokukhwezwa kwentengo yamafutha ezimotha kungxoxo ayenze leStudio 7.
"Abantu bathe belindele ukuthela iphethulu ezimothweni bekundwendwe abamagaljini babatshela ukuthi basake bame okwesikhatshana kusaguqulwa intengo yawo, emini ngezikhathi zabo 3 kusiya kubo 4 khonapho. ekuseni intengo ivuke kungeyayizolo yazoguqulwa sokusemini, abantu bamangala ngalinguquko, ikakhulu labo abasebenzisa imitshova abakade bebuye bengela mali yokugada imitshova ngembadalo entsha"
