amalinks wokungena

Breaking News

Chinamasa: Usizo Nxa Lusiza Elizweni Kumele Luye Ezandleni Zikahulumende


Umpathintambo wezemali umnumzana Patrick Chinamasa
Umpathintambo wezemali umnumzana Patrick Chinamasa

Umphathintambo wezemali, umnumzana Patrick Chinamasa utshele inhlanganiso eziphathisa uhulumende ngemali yokusebenzisa enhlelweni zentuthuko, ukuba lolusizo nxa lusiza elizweni kumele luqale ludlule ezandleni zikahulumende.

UChinamasa, utsho lamazwi evula okusemthethweni umhlangano wakuqala, wokubonisana phakathi kukahulumende lenhlanganiso eziphathisa ngosizo owenzelwe eweteleni ye Holiday Inn eHarare.

Uqonqosele ngokuphindiweyo uChinamasa,ukuba uhulumende engasoze avuma ukubekwa umlandu phezu kwemali eza elizweni kusetshenziswa indlela zingekho emthethweni.

Waveza njalo ukuba lumhlangano, uqhutshwa ngenhloso yokubonisana phezu kwendlela ezingasetshenziswa ukuqinisa ubudlelwano phakathi kwalezi nhlanganiso lohulumende, ukuqhuba imisebenzi yokuthuthukisa inhlalakahle kazulu elizweni.

Lumhlangano wenziwa ngesikhathi uhulumende eqhuba inhlelo zokuthuthukisa inotho welizwe ngaphansi kohlelo lwe ZIMASSET.

Kodwa omunye wabakade bekulomhlangano, ummeli weMelika eZimbabwe, umnumzana Bruce Wharton, utshele intathelizindaba ukuba kuqakathekile ukuba eleZimbabwe lilondoloze imithetho yalo, ikakhulu kwezokusungulwa kwamabhizimusi kukhangelwa ukunikezwa kwawo kwabensundu – owe Indiginisation and empowerment.

Ummeli we UN eZimbabwe, umnumzana Bishow Parajuli utshele lumhlangano ukuba kunengi osekwenziwe ukuthuthukisa impilo kazulu, lanxa imali bezilethwa zingaqondiswa esikhwameni sikahulumende, kusetshenziswa indlela ezehlukeneyo.

Le, uParajuli, uthi ibalisa ukwehliswa kwenani labesifazane abalahlekelwa yimpilo ngesikhathi bebeletha ngesilinganiso sokukodwa kokuthathu, ukuqansa kwenani labantwana abahlatshwa lokuphiwa imithi yokubavikela imikhuhlane ngesilinganiso sokungamatshumi phose ayisikhombisa ekhulwini-69%, ukutholiswa kwengwalo ezanelayo ezikolweni kanye lokwehliswa kwemathuba wokuthelelwa kwengane ngunina igciwane lengculaza, kanye lekulotshweni kwesisekelo sombuso esitsha selizwe.

Lumhlangano wosuku olulodwa, ungenwe zingcwethi kwezomnotho, abammeli bamazwe kuleli, amalunga leziphathamandla zenhlanganiso ezikumanyano wamazwe omhlaba owe United Nations, inkokheli zengatsha ezitshiyeneyo zikahulumende kanye lentathelizindaba.

XS
SM
MD
LG