Umhlangano weSadc ozaqhutshelwa eWindhoek kweleNamibia ngoLwesihlanu awuseyikuhlaziya udaba lwezombusazwe eZimbabwe njengalokho obekukhangelelwe.
Umabhalane weSadc uMnu Tomaz Salomao utshele iStudio 7 ukuthi udaba lweZimbabwe solulakho ukuhluzwa emhlanganweni ozakwenzelwa eSouth Africa mhlaka 11 kumbe mhlaka 20 ngenyanga ezayo.
UMongameli Jacob Zuma weleSouth Africa, yena ongumlamulankunzi kudaba lweZimbabwe ubemele ayekwazisa inkokheli yeSadc ukubana sefike ngaphi ngemizamo yakhe yokulungisa udaba lweZimbabwe.
Kodwa uZuma ubikwa ethe kasoze enelise ukuya kulumhlangano ngoba ephatheke ngokhetho lokudinga amakhansila amatsha elizweni lakhe oluqale ngoLwesithathu kuliviki.
Ingcwethi ecubungula ezombusazwe uMnu Mlamuli Nkomo uthi inkokheli yeSadc ikhanya iludondela udaba lweZimbabwe.
