Kuqhamuke udlakela emngceleni weBeitbridge ngoLwesihlanu kwatshiswa umdadada wendlu (warehouse) egcinelwa impahla lugatsha olukhangelane lokuqoqa imithelo olweZimra.
Udlakela lolu luqhamuke ngemva kokutshengisela kwenkulungwane zabantu bekhonona ngomthetho kahulumende ovimba ukuthengwa kwempahla egoqela ukudla kwamanye amazwe.
Ababone udlakela lolu lusenzakala batshele iStudio 7 ukuthi abatshengiseleyo laba babulale ama-robot njalo bagcwalisa lamatshe emigwaqweni okokuthi bekungasela zimota ezihambayo.
Umthetho lo uqale ukusebenza ngoLwesihlanu njalo wenqabela ukuthengwa kwempahla ethize kwamanye amazwe nxa umuntu engela layisensi.
Umngcele wona uke wavalwa okwamahola ayisithupha phezu kokutshengisela lokhu, okumanyanise izizalwane zeZimbabwe lezeSouth Africa phetsheya komngcele.
Ukutshengisela lokhu bekuqoqwe yinhlanganiso yezakhamizi, iBeitbridge Combined Residents Association.
Lanxa amapholisa eSouth Africa etshele abatshengiselayo laba ukuthi azakhulumisana labosowabo beZimbabwe, uhulumende uthi kabuyeli emuva ngalumthetho, owasungulwa nguhulumende wabahuquluzi ngo1974.
Umthetho lo uvimba abantu abangela malayisensi ukuthenga impahla ebalisa amanzi asembodleni, isalad cream, amafutha okupheka, uchago, idobi lokunye okunenginengi okugoqela okokwakhisa izindlu, kwamanye amazwe.
Isikhulumeli senhlanganiso yabaphila ngokuthenga kwamanye amazwe bethengisa, iInternational Cross Borders Association, uMnu. Dennis Juru we Studio Seven utshele iStudio 7 ukuthi kuyaxokozela kakhulu kulumngcele.
