amalinks wokungena

Breaking News

Udlela Evalweni uNorman Mapeza kuMncintiswano weCAF


Umqeqetshi weqembu lomdlalo wenguqu eleFC Platinum uNorman Mapeza
Umqeqetshi weqembu lomdlalo wenguqu eleFC Platinum uNorman Mapeza

Iqembu le FC Platinum lizemukela ele Nyasa Big Bullets kusasa enkundleni ye Barbourfields lidinga ukuba linqobe ukuze lidlulele kusigaba esilandelayo salumncintiswano ngoba lingahle liphelelwe ngumphako uma linganqotshwa kumbe umdlalo uphele zingutshiki lobhanqa kube lamagoli ahlohliweyo.

Lokhu kungoba umdlalo wehlandla lakuqala odlalwe emavikini amabili edluleyo uphele zingutshiki lobhanqa kungela qembu elenelise ukulitshayela emambuleni.

Limpumela eyehlandla lakuqala itsho ukuba iqembu le FC Platinum akumelanga livumele iqembu lezivakatshi lihlohle ngoba amagoli angahlohlwa liqembu leli ezabalwa kabili.

Ngalokho ke umqeqetshi weqembu le FC Platinum uMapeza uthi kuzamele badonse kanyekanye ukuze baphumelele.

“Kuzamele sisebenze gadalala ngoMgqibelo ukuze sithole impumela esiyifunayo. Emdlalweni wehlandla lakuqala sidlale kuhle kakhulu kodwa kuzamele silungisise ukudlala kwethu phambi kwegedi ngoba ukuhlohla yikho okudala umehluko emdlalweni wenguqu,” kutsho uMapeza.

Kumncintiswano owedluleyo iqembu le FC Platinum liphelele kusigaba sezibaya njalo bekungokwakuqala ukuba lifinyelele kulesosigaba selokhu liqale ukuphatheka kumidlalo eyokudinga intshantshu zezwekazi lase Africa.

Kolunye udaba olufanayo iqembu le Triangle livakatshele kwele Burundi ukuyadlala leqembu le Rukinzo kuhlandla lesibili elomncintiswano we CAF Confederation Cup.

Lumdlalo uzadlalwa ngeSonto njalo iqembu le Triangle lingena kuwo likhokhela nge 5 ka nya.

Kumidlalo yesigaba se Castle Lager Premier Soccer League ekhona kulimpelaviki kusasa ngoMgqibelo iqembu le Bulawayo Chiefs lizadlala lele Black Rhinos ngase Luveve, iqembu le Chapungu lizadlala lele CAPS United ngase Ascot, iqembu le Ngezi Platinum Stars lizemukela ele Hwange ngase Boabab, iqembu le Yadah lizangqikilana lele Herentals ngase Rufaro kuthi iqembu le ZPC Kariba lizadlala lele TelOne ngase Nyamhunga.

NgeSonto iqembu le Highlanders lizadlala lele Harare City ngase Barbourfields kuthi ele Dynamos lizangqikilana lele Chicken Inn ngase Rufaro.

Umncintiswano walonyaka owe Spar Bonsa T20 Cricket League uqhubekela phambili kulimpelaviki njalo amaqembu azadlala ngokulandelayo.

Emdlalweni wakuqala kusasa ngoMgqibelo iqembu le Fastjet Badgers lizadlala lele National Fencing Tigers, emdlalweni wesibili iqembu le Pepsi Hawks lizadlala lele Mermaid Pools Blazers kuthi emdlalweni wesithathu iqembu le Canela Sabres lizangqikilana lele Fazak Power Raptors.

NgeSonto iqembu le Fastjet Badgers lizadlala lele Mermaid Pools Blazers emdlalweni wakuqala, kowesibili iqembu le Pepsi Hawks lizadlala lele Fazak Power Raptors kuthi kowesithathu iqembu le Canela Sabres lizadlala lele National Fencing Tigers.

Limidlalo iqhutshelwa endaweni ye Heath Streak Multi Sports Academy.

XS
SM
MD
LG