UMongameli Emmerson Mnangagwa ubikwa eseqhube imihlangano lamankamapni eChina atshiyeneyo, wona asethembise ukusebenzelana leleZimbabwe kunhlelo zokuthuthukisa umnotho welizwe.
Amanye alamankampani abikwa ayevele esethembise ukusungula amabhizimusi kwele Zimbabwe uMongameli Mnangagwa aze ethekelele kwele China ekuqaleni kwawonalo umnyaka.
Lokhu kwenzakale ngemva komhlangano kahulumende weChina lenkokheli yamazwe akuzwekazi leAfrica, owe 7th Forum on China-Africa Cooperation (FOCAC) Summit, ogqitshwe ngoLwesibili.
Ekhuluma emhlanganweni lo, uMnangagwa uthe eleZimbabwe lizaguqula imithetho ukwenzela ukuthi kubelula kubosomabhizimusi bakwamanye amazwe ukuthi beqhube imisebenzi elizweni kungelangxaki.
Lokhu kwenzakala imali yohlobo lwama dola eMelika isilela elizweni, intengo yempahla ilokhu ikhuphuka mahlayana, njalo ezinye zalezi impahla zisilela.
Ukuhlaziya loludaba, sixoxe loMnu. Melusi Moyo, umabhalane obona ngenhlelo zokuqhutshwa kwamabhizimusi kunhlanganiso elwela amalungelo ezakhamizi, eyeBulawayo Progressive Residents' Association.
UMnu. Moyo uthi inengi lezakhamizi zithwele amagabha avuzayo njalo azilathemba lokuthi imizamo kahulumende izathuthukisa umnotho welizwe.
Ingcwethi ecubungula ezombusazwe uMnu. Masimba Kuchera uchasisa izizatho zokusilela, kanye lokukhwela kwentengo yempahla elizweni.