amalinks wokungena

Breaking News

Ufika eZimbabwe Umqeqeshi Omutsha weBosso


Umqeqetshi omutsha weHighalnders u-Erol Akbay

Useze wafika kweleZimbabwe umqeqetshi omutsha weqembu lomdlalo wenguqu ele Highlanders uErol Akbay ngemva kokuthola amaphepha amvumela ukuba engasebenza elizweni.

UAkbay uphiwe umthwalo wokuba anqobe emidlalweni eyisithupha phakathi kwemidlalo elitshumi eyokuqala kwesizini njalo inkokheli yeqembu ithi izathokoza nxa engaqeda lonyaka iqembu le Bosso lihlezi kundawo yesine loba phezu kwalapho engalaneni yemiklomelo.

Umqeqetshi weHighalnders omutsha, uErol Akbay eloNdumiso Gumede
Umqeqetshi weHighalnders omutsha, uErol Akbay eloNdumiso Gumede

Ngomnyaka ozayo lumqeqetshi oyisizalwane sakwele Holland ukhangelelwe ukuphakamisa isicoco seligi njengoba kuyabe sekumnyaka wakhe wesibili eziphethe esidukwini njalo esebe lethuba lokuzidingela abadlali abadlala ngendlela efunwa nguye.

Ekhuluma lentathelizindaba zemidlalo esanda kufika koBulawayo ngoLwesibili emini uAkbay uthe uyathokoza ukuba useze waphumelela ukuzoqala umsebenzi kuqembu leBosso.

Ngiyajabula kakhulu ukuba lapha ukuzoqala umsebenzi njalo ngiyakholwa ukuba iqembu le Highlanders liqembu elikhulu okumele lincintise ukuphakamisa isicoco seligi. Yikho ke ngiyathembisa ukuba leliqembu lizadlala ngendlela ebukekayo kuthi ekupheleni kwesizini izifiso zethu zibe zifezekile”.

Kuthethe isikhathi eside ukuze uAkbay azoqala umsebenzi kuqembu le Highlanders loba nje kwazakala nyakenye ukuba nguye osengumqeqetshi waleliqembu.

Imbangela yalokhu yikuba wayelethe amaphepha alotshwe ngolimi lwesi Dutch ngesikhathi edinga incwadi zokuba asebenze kwele Zimbabwe okusemthethweni kwasekuthatha isikhathi ukuba lawo maphepha antshintshelwe kulimi lwesingisi aphinde njalo adindwe ukuba ngaweqiniso.

uAkbay uzasebenza loCosmas Zulu loAmin Soma-Phiri. (Photo: Joseph Njani)
uAkbay uzasebenza loCosmas Zulu loAmin Soma-Phiri. (Photo: Joseph Njani)

UAkbay uzasebenza ndawonye lo Amini Soma – Phiri ongumsekeli wakhe kanye loCosmas Zulu yena ongumcebisi wakhe aphinde njalo abe ngumqeqetshi wabonozinti.

USoma – Phiri kanye loZulu yibo abaphathise iqembu le Highlanders ukuba lisinde engozini eyokugunyulwa kusigaba saphezulu njalo liphinde liphakamise inkezo yeEasycall nyakenye ngemva kokuxotshwa kowayeqale umnyaka engumqeqetshi we Bosso uBongani Mafu.

XS
SM
MD
LG