Owesifazana weBhilithani, uNkosazana Ghislaine Maxwell, ufunyanwe yinkantolo yeMelika izolo elamacala amahlanu okuphathisa inkisela yaseMelika ake wathandana layo, uJeffrey Epstein, ukuya emacansini lamantombazana aleminyaka ephansi.
UMaxwell ubesetheswa amacala ayisithupha kodwa idale limgezile kwelilodwa lalawa macala. Ingcwethi kwezemithetho zithi ubhekane lesigwebo eside.
UEpstein yena wazibophela wafela ejele ngo2019 ngesikhathi emelele ukuthonisiswa ngamacala okuhlukuluza lokuya emacansini lamantombazana lawa.
Kusenjalo, amaDemocrats lamaRepublicans athi owake waba nguSenator wesigaba seNevada, uMnu Harry Reid utshiye imbali ejulileyo ngendima ayidlale okweminyaka engamatshumi amathathu elilunga lephalamende.
UReid udliwe ngumkhuhlane wemvukuzane ngoLwesibili eseleminyaka yokuzalwa engamatshumi ayisitshiyangalombili lambili, 82.
Wabamba iqhaza elikhulu ekupasiseni imithetho egoqela owezempilakahle ngesikhathi sikaMongameli Barack Obama oweAffordable Care Act.
Yena uObama, olilunga lemaDemocrats, uthe ngabe kungayisu Reid ngabe mhlawumbe kazange aba nguMongameli weMelika.
Abanye abamtshayele ihlombe bagoqela ophethe isikhundla ake waba kuso esokukhokhela amaDemocrats kuSenate, uMnu Chuck Shumer, lelunga lamaRepublicans uMnu Mitch McConnell.
Ocubungula ezombusazwe, uMnu Den Moyo utshele iStudio 7 ukuthi ngempela uReid utshiye imbali ebanzi kwezombusazwe ngoba ibanzi indima ayidlalayo.
