Uhlelo lweziphathandla zikamsitheli lokubhoda ngelizwe zithathisa izithupha, ama birth certificates lencwadi zokufa luqale ngoMvulo kulokukhonona kwabanengi abathi imbadalo yemisebenzi le inengi kakhulu.
Loluhlelo lwenziwa phambilini kohlelo lokubhalisa abazavota kukhetho lomnyaka ozayo.
Abalabazali abazalelwa phandle kwelizwe kumele bakhokhe imali engamadola angamatshumi amahlanu, kuthi abafuna ukuguqula izithupha zezenge ukuthi baphiwe ezingamaphepha eplastiki nxa zalahleka kumele bahlawule amadola alitshumi lanhlanu.
Okunye okubikwa kungaphathanga kahle uzulu yikuthi nxa incwadi zakho zokuzalwa zingakhanyi kahle kumele ube labafakazi njalo uye emahofisini amakhulu hatshi kuziphathamandla lezi.
Umsitheli, uMnu. Tobaiwa Mudede, uqondise amazwi akhe awethule kuviki edluleyo ewokuthi abalezithupha zensimbi kabasoze bavunyelwe ukuvota esithi labo bazaphiwa ithuba lokubhalisa.
UNkosazana Ellen Shiriyedenga, unobhala obona ngokuqoqwa kwenhlelo zebandla leMDC ekhokhelwa nguMnu. Welshman Ncube, uthe, "Sithole ama report amanengi, ikakhulu kulabo akade befuna izithupha ngoba zalahleka abathi bebexotshwa ngoba bengelamali yokubhadala.”
