Laloba uhlelo lokuhlabisa abantwana amajekiseni okuvikela imikhuhlane ehlasela abantwana bekumele lugqitshwe Ngolwesibili mhla zimbili kuNhlangula ezigabeni zonke zelizwe, iStudio 7 yemukele imbiko ethi ugatsha lwezempilakahle soluluqhelisile kwezinye indawo ngamalanga athize.
Inhlanganiso ye World Health Organisation engeyinye yenhlanganiso eziphathisana logatsha lwezempilakahle ithi soluqhelisiwe loluhlelo esigabeni se Seke District duzane leHarare, ukwenzela ukuthi abazali abangenelisanga ukuhlabisa abantwababo ensukwini ezilitshumi ezedluleyo, benelise ukukwenza lokhu.
I-United Nations Children’s Fund-UNICEF ithi ibilokhe isaqoqa ukuthi yiziphi izigaba ezizaqhubeka ngohlelo njalo zizaqhubeka kuze kube nini. IUNICEF ithi iphakathi kokuqoqa inani labantwana abahlatshiweyo. Uhlelo lolu luqale mhlaka 24 ngoNkwenkwezi ngenjongo yokwenqabela ukumemetheka kwemikhuhlane yabantwana efana lendingindi.
