Ihloko kahulumende uMmnu. Morgan Tsvangirai uthi uhlelo lwe indigenization lubisela ele Zimbabwe emuva njengoba osomabhizimusi abafuna ukuvula amafekithali besesaba ukuthi bangawathathelwa kuhlelo lokwabelana amashares amankampani emazweni.
UTsvangirai utshele intatheli zindaba lamuhla eHarare ukuthi osomabhizimusi be Melika akade ebalonda ngeviki ephelileyo bathi bafuna kube lohlelo olubonakalayo oluzakwenza ukuthi bengathathelwa amankampani.
Uthe okwamanje bayesaba ukuthi uhulumende womanyano uyadonselana ngakho-ke batshwaywa luvalo nxa becabanga ukuvula amafekitheli kwele Zimbabwe.
Ingcwethi zenotho zithi uhlelo lokwabelana amashares amankampani emazweni kumele lumiswe ngoba lozulu kazimiselanga ukuthenga amashares la ngenxa yokuswela ulwazi lokuthi umkambo wemali usebenza njani.
Ingcwethi lezi zithi uzulu udinga imali yokuthenga ukudla lokunye nje okufuneka mihlayonke kulokuthenga amashares amankampani emazweni alakho ukwehla intengo ngenxa yokugududeka komnotho womhlaba wonke jikelele.
Eyinye yengcwethi lezi uMnu. Masimba Kuchera uthi uhlelo lolu kumele lumiswe.
