Umphathintambo wezemali uMnu. Tendai Biti uthi uhulumende kalamali yokukhuphula iholo lezisebenzi njalo lokubhadalela inhlelo ezitshiyeneyo zikazulu okungenza ukuthi ibudget yalonyaka ibe lenswelo kumbe iDeficit yezigidi ezingamakhulu amahlanu zamadola eMelika-$500million.
UBiti utshele idale lephalamende ukuthi kusobala ukuthi imali engena esikhwameni sikahulumende kayenelisi ukukhuphula iholo lezisebenzi ezibikwe kumaviki aphelileyo zisithi uhulumende sevumile ukungezelela iholo lazo.
Uqhubeke wathi umumo wezinto kawuvumi vele ukuthi kwenziwe iSupplementary Budget njengoba uhulumende engelazo indlela ezinye zokuthola imali.
Uphinde wathi imali yemthelo etshiyeneyo ebhadalwa ngamankampani lozulu ngenyanga iyehla okumangalisayo ngenxa yobubi besimo somnotho weZimbabwe.
Ingcwethi kwezenotho uMnu. Rejoice Ngwenya uthi okukhulunywa nguBiti liqiniso ngoba uhulumende kalamali yokwenza inhlelo ezitshiyeneyo lokukhuphula iholo lezisebenzi.
