Uhulumende womanyano useqalisile ukudinga amankampani emazweni angancedisa inkampani ye Zimbabwe Iron and Steel Company (Ziscosteel) ukuthi iqalise ukwemba insimbi.
Abazi ngokwenzakalayo bathi lokhu sokwehlukanise abaphathintambo bengatsha zikahulumende njengoba abakubandla le Zanu PF befuna amankampani awempumalanga kuthi amacele womabili eMovement for Democratic Change bakhalela iArcelor-Mittal ye South Africa kanye le Jindal Steel ye India.
Enye yalamankampani ibikhangelelwe ukuthi inikwe imvumo nguhulumende eyokusebenza le Ziscosteel kodwa uhulumende wathi lamankampani makhulu kakhulu okungenza ukuthi athathe inotho yonke ye Ziscosteel.
Umnu. Nkululeko Sibanda ingcwethi ecubungula ezombusazwe utshele uGibbs Dube we Studio 7 ukuthi iZiscosteel kumele ingabi ngaphansi kukahulumende njengoba bebanengi abasekeli bebandla le Zanu PF abafuna inotho yenkampani le.
