Lanxa uhulumende ehlulekile ukuhlawula abongi labodokotela imali yamabonus anyakenye ngoLwesine, wenelisile ukuhlawula amapholisa ngoLwesihlanu.
Umphathintambo wezemali uMnu Patrick Chinamasa uthe abongi labodokotela bazathola imali yabo ngeviki ezayo kanye lezisebenzi zamajele.
Uthe njalo ababalisi lezinye izisebenzi zikahulumende bazathola awabo amabonus ekupheleni kwenyanga.
Ukwehluleka kukahulumende ukuhlawula odokotela kuza ngesikhathi ukusilela kwabodokotela sokubangele ukuvalwa kwenhlangothi ezamukela izigulane eMpilo Central koBulawayo laseHarare Central.
Ugatsha lwesibhedlela seMpilo luvalwe ngeviki edluleyo njalo olweHarare Central luvalwe ngoLwesihlanu.
Ukusilela kwabodokotela lokhu kubangelwa yikudonselana okukhona phakathi kukahulumende labodokotela abasanda qeda izifundo phezu kodaba lweholo lokunye.
Umskeli kamkhokheli webandla lePeople’s Democratic Party uMnu Sam Sipepa Nkomo uthi ukwehluleka kukahulumende ukuqakathekisa ezempilakahle kuveza sobala ukuthi seyehlulekile ukubusa kuhle.
