amalinks wokungena

Breaking News

Uhulumende Udinga Imali Yokubhadala Amabonus Ezisebenzi


Inhloko kahulumende uMnu. Morgan Tsvangirai uthi uhulumende lokhe esadinga izigidi ezingamakhulu amathathu zamadollar eMelika zokubhadala amabonus ezisebenzi.

UTsvangirai ubikwa ethi imali le ingatholakala ekuthengiseni amadayimana embiwa eMarange loba nje umphathintambo wezemigodi uMnu. Obert Mpofu engakethuleli idale leCabinet ukuthi lokhu kungenziwa njani.

Uthi nxa kungehlula ukuphanda imali eMarange kuzamele uhulumende adinge imali le ngezinye indlela njengoba izisebenzi zathenjiswa ukubhadalwa amabonus.

Omele izisebenzi zikahulumende kunhlanganiso ye Apex Council uNkosikazi Tendai Chikowore uthi okwamanje uhulumende kabikelanga izisebenzi ukuthi uhlutshwa yikudinga imali yokubhadala amabonus.

Unkosikazi Chikowore uthi kumele imali le itholakale njengoba izisebenzi zimelele amabonus ngamehlo abomvu.

Kodwa-ke iZimbabwe National Chamber of Commerce (ZNCC) ibika ukuthi izisebenzi zamankampani atshiyeneyo eZimbabwe kazisoze zithole amabonus ngenxa yokuthi kunzima ukuthola imali yokwenza impahla kanye lokubhadala iholo.

Unkosikazi Ntombenhle Moyo ongumgcinisihlalo we ZNCC koBulawayo uthi izisebenzi ezinengi kazisoze zibe lekhisimusi enhle lonyaka nxa zingatholanga ibonus.

Umnu. Isaac Mabuka owake waba ngumgcinisihlalo we ZNCC uthi amabonus abhadalwa nxa kubongwa izisebenzi eziyenze umsebenzi okubukekayo kodwa-ke lokhu kungeke kwenzakale lonyaka ngenxa yokungathuthuki kwenotho ye Zimbabwe.

XS
SM
MD
LG