Umphathintambo wezemvelo uMnu. Francis Nhema uthi uhulumende usebumba umthetho ozakwenza ukuthi imota ezindala ezivela kwamanye amazwe zingavunyelwa ukuthengiswa eZimbabwe.
U Nhema utshele amaphephandaba ukuthi izimota ezindala ezivela emazweni anjenge Japan zibulala abantu emgwaqweni njalo zikhipha intuthu edlula okuvunyelwayo emazweni lapho ezithengwa khona.
Uphinde wathi nxa imota lezi zingavinjwa ukulethwa eZimbabwe, kuzanceda ukuthi amafekithali ezimota elizweni avuselele ukuthengisa imota ezintsha.
Abacubungula ezenotho bathi nxa kungaba lomthetho onjalo, uhulumende uzalahlekelwa ngumthelo obhadalwa nxa izimota lezi zilethwa elizweni njalo amabhizimusi okuthengisa izimota asacathulayo alakho ukuvalwa.
Kodwa-ke abanye bathi lokhu kungathuthukisa amabhizimusi alungisa izimota elizweni.
Umnu. Sam Ncube umsekeli womqondisi we Affirmative Action Group utshele uGibbs Dube oweStudio 7 ukuthi akumelanga uhulumende afake umthetho lo wezimota engelamaqhinga okuthi uzulu uzathenga njani imota ezile ntengo ephansi.
