Umphathintambo kahulumende obona ngokwethulwa kwembiko uNkosikazi Monica Mutsvangwa usegcizelele ukuthi abatholakala besephula iziqondiso zeCOVID 19 abagoqela abatshayeli bezimota abakubhizimusi yokuthwala abantu bona bengabhalisanga kunkampani yeZUPCO bazabotshwa ngoba besabalalisa lumkhuhlane.
Inhlanganiso yeBulawayo Progressive Residents Association, imanyene lezinye, isanda ukuqoqa umhlangano lapho abavumelane khona ukuthi bazalobela uhulumende kanye lekhansili yalelidolobho incwadi ekhalaza ukuthi kuvunyelwe abanye abakubhizimusi yokuthwala abantu ukuthi besebenze.
UNkosikazi Terresia Nyathi umabhalane wogatsha oluphathelane lezimota ezithwala abantu kunhlanganiso le uthi sebekhuthaza lamalunga edale lephalamende ukuthi akhulume ngaloluhlupho, ngoba lungeyinye yembangela ememethekisa i-COVID 19.
Ugatsha olubona ngezempilakahle olwe World Health Organization eZimbabwe lithi litshayela omongi ihlombe ngomsebenzi omuhle abawenzayo ngalesi isikhathi kulobhubhano lweCOVID 19, njalo kunanzwa usuku lweWorld Nurses Day. Embikweni eliwethule enkundleni yebulenjini obe Twitter, inhlanganiso le ithi ikhumbula njalo ababulawa yilumkhuhlane.
Kusenjalo, ugatsha lukahulumende luthi abantu asebahlaselwa ligcikwane leCoronavirus elizweni selokhe laqhamukayo sebefika phose inkulungwane ezingamatshumi amane; 40 thousand labulala abedlula inkulungwane elengxenye yayo-1, 579 selokhe laqhamukayo ngomnyaka odluleyo. NgoLwesibili kuphela, i-COVID 19 ibulele abathathu yahlasela abalitshumi lanhlanu. Asebehlabe ijekiseni yokwenqabela lumkhuhlane sebesedlula inkulungwane ezingamakhulu amahlanu; 539 526.