Abantu abanengi abhalisayo bedinga ukuthola ingwalo zokuhambisa ezamapassport nyakenye, babikwa lokhu bengakazitholi. Uhulumende uyayilandula imbiko ethi amapassports asekhwezwe intengo yokuwathola.
Lokhu kuza ngemva kokuba uhulumende eke wamisa umsebenzi wokupha uzulu ama passports ngeviki ephelileyo, okwenze abanengi becabanga ukuba engacina esekhweza intengo lezi ncwadi.
Inengi labantu liveze ukudana ngokuphuza ukuphuma kwalezi ncwadi besithi sokubabisela emuva emisebenzini yabo.
Omunye wabo ngosakhulayo uNyasha Maphosa ophila ngokuthenga impahla phandle kwelizwe ethengisa uthi lokhu sokumbisela emuva emsebenzini wakhe.
“Mina sengikhathele mina, ngiyathengisa into zami ngizithatha eSouth Africa khathesi iPassport yaExpire sengithethe eyinye yakhona , ukuthi iphuma ayiphumi sengiphelelwe angikwazi ukuthi ngiyakuhambisa njani ngoba izikolo ziyavulwa kathesi , ibhizimusi selimile sengikhathele mina”
Lokhu kusekelwe ngomunye njalo osakhulayo uFaith Ncube yena othi kunzima ukuthola imali engangamakhulu edlula amabili lengxenye yamadollar-$253 yokuba athathe ipassport yeviki, esithi lokhe emelele ipassport ye $53 kusukela nyakenye ngo Ntulikazi.
“I$253 inengi kakhulu, amabhizimusi ethu kala nzuzo enengi. Imali yakhona vele kasilayo, ayeneli so besicabanga ukuthi ngabe imali yakhona bayehlisa ngoba sibili sebesivalele phandle ngoba ngeke senelise ukuthi sisbhadale, imali le inengi kakhulu ngoba lami vele ngidinga ukusebenza”
Kodwa umqondisi wehofisi yokubhalisa ingwalo eziqakathekileyo aka Registrar General uMnu Clement Masango uthi imitshina yokulungisa yamapassport ilungiswe ngoLwesihlanu lweviki ephelileyo.
“Imitshina yethu yalungiswa ngolwesihlanu kodwa umphathintambo uzethula umbiko emini ngakho ke angisoze ngiqhubekele phambili”
Ekhuluma emhlanganweni lentathelizindaba umphathintambo wendaba zasekhaya, uMnu Cain Mathema uthi uhulumende akasoze akhweze indleko yokuthola ipassport, njalo uzakwenza kube lula ukuyithola.
I passport yentengo ephansi ibiza amadola angamatshumi amahlanu lantathu $53, kuthi leyo etholakala ngemva kwamalanga amathathu kusiya kuviki ibiza amadola angamakhulu amabili lamatshumi amabili lantathu-$253 kuthi ephuma langa linye ibiza amakhulu amathathu lasitshiyagalombili- $318.
Inane labantu ababhalisa bemelele ukuthola ipassport selisedlula inkulunwane ezingamakhulu amabili, kutsho uMasango.
