Uhulumende uthi usenike amankampani amakhulu imvumo yokuthenga amafutha ezimotha awephethulo ledizili phandle kwelizwe besebenzisa izimali zabo zakwamanye amazwe.
Leli nyathelo uhulumende ulithatha ngenhloso yokuzama ukuqeda uhlupho lokusilela kwamafutha ezimotha osolulenyanga ezithile lubhahile emadolobheni wonke elizwe.
Lesi ngesinye sezinqumo eziphume emhlanganweni wedale labaphathintambo bakahulumende, owe cabinet, owenzelwe eHarare ngoLwesibili.
Umphathintambo obona ngokwethulwa kwemibiko uNkosikazi Monica Mutsvangwa utshele intathelizindaba ngemva kwalumhlangano ukuthi abamankampani afana lakumsebenzi wokwemba owemigodi, akumsebenzi wezokulima lamanye yiwo aphiwe imvumo yokuzithengela amafutha wokusebenzisa ukuze bengaphazanyiswa yikusilela kwawo elizweni.
Abantu makhaza bake bavunyelwa ukuzithengela inkulunwane ezimbili zamaliter ngomnyaka ka 2015 kodwa uhulumende waphanga wakhipha lesi sibopho ngakhoke lalonyaka abantu makhaza abasoze bavunyelwe ukuzithengela amafutha ezimotha.
UMnu. Bulisani Ncube, ingcwethi ecubungula ezombusazwe utshele uSithandekile Mhlanga weStudio 7 ukuthi yikho okwakumele uhulumende akwenze vele ekuqaliseni kwalolu hlupho lokusilela kwamafutha ezimotha.
“Uhulumende wayevele engamelanga ukuthi aphatheke emsebenzini wokuthenga amafutha, yena kumele abe ngolawula intengo yawo ukuze abamankampani banganotheli phezu kwabantu. Ukuthi abe nguye okhokhela kulumsebenzi kade kuvele kuliphutha”, kutsho uNcube.
