Uhulumende usedinge izigidi ezingamatshumi amane lanhlanu zamadollar eMelika yokuthengela abahluphekayo labalimi abathuthukayo inhlanyelo lemvundiso ye fertilizer yalonyaka.
Umphathintambo wezokuthuthukisa inotho uMnu. Tapiwa Mashakada uthi abantu abahluphekayo abayinkulungwane kanye labalimi abathuthukayo abazinkulungwane ezingamakhulu amane bazathola inhlanyelo le lemvundiso ye Compound D le Ammonium Nitrate.
Uthi iGrain Marketing Board ikhangelelwe ukuthi izathengela abalimi laba inhlanyelo lemvundiso ye fertilizer ibe isinika labo okumele bayithole kungela bandlululo lokuthi basekela ibandla liphi lezombusazwe.
Umsekeli wompathintambo wezokulima uMnu. Seiso Moyo okubandla le Movement for Democratic Change ekhokhelwa nguMnu. Morgan Tsvangirai uthi abalimi bayajabula ngokuthi sebezathola inhlanyelo kanye lemvundiso ye fertilizer loba kuyingcosana.
Ingcwethi kwezokulima ezimele yodwa uMmnu. Mandla Nkomo uthi uhulumende kumele ayenze uhlelo oluphakeme lokuthuthukisa abalimi kulokuthi yonke imnyaka abe elokhe ebanika inhlanyelo.
