Uhulumende ubikwa esithi uzakwengezelela uncedo lokudla lemali olutholwa ngabaswelayo olubalisa ama cash transfers kanye lamasaka e rice awaphiwa yilizwe leChina.
Isiphathamandla sikahulumende uMnu. Paul Mavhima ubikwa esithi ababethola amadola alitshumi kuphela sebezathola angamakhulu amabili lamatshumi amahlanu-250 dollars njalo imali le izakwengezelelwa kubalwa leyomnyaka odluleyo, okutsho ukuthi izakuba backdated kusukela ngoJanuary 2019. UMnu. Mavhima uthi uhulumende usebeke eceleni imali eyibhiliyoni eyodwa yamadola ukuqhuba loluhlelo.
Uthi inani lezigaba ezithola loluncedo lizakwengezelelwa lisuka kwezingu 23 lisiya ku33 kuthi lezo ezisalayo zithole usizo lwe public assistance programme.
UMnu. Mavhima uqhubeke wathi ezinye imuli zemaphandleni kanye lezedolobheni lakoBulawayo leleHarare, zizaqhubeka zithola isaka le50kg yerice nyanga zonke.
Lokhu kwenzakala inhlanganiso yeWorld Food Program isithi isisengezelela uncedo elipha abalambayo ngoba inani labo selikhuphuke kakhulu.
Sixoxa loNkosikazi Febbie Dube ohlala eBinga ukuze sizwe ukuthi kwesakhe isigaba kwabiwa njani lokhu ukudla.
