amalinks wokungena

Breaking News

Uhulumende Uthi Kasoze Avume Ukuthi Imigodi Yabele Uzulu Amashares Ayingcosana


Umphathintambo wazabasakhulayo lokuthuthukisa inotho kazulu uMnu. Saviour Kasukuwere uthi uhulumende kavumelani lamankampani ezemigodi afuna ukunika abansundu isilinganiso samashares kumankampani esingaphansi lalokho okufunwa nguhulumende.

Amankampani la athi alakho ukupha okuyisilinganiso esedlula amatshumi amabili lesithupha ekhulwini kuphela angasiwo adingwa luhlelo lwe indigenization.

UKasukuwere utshele iZimbabwe Broadcasting Corporation ukuthi uhulumende usehlolisise lokho okunikezwe ngamankampani la wathola ukuthi kawafuni ukulandela iziqondiso zomthetho wokwabelana amashares amankampani emazweni.

Uthe uhulumende sezasebenzisa umthetho lo ngokugcweleyo ukwenzela ukuthi uhlelo lolu luphumelele. Uqhubeke ethi amankampani ezemigodi kawasoze avunyelwe ukuthi asebenzise inhlelo afuna ukuzenza duzane lemigodi, ama empowerment credits, ukwenzela ukuthi lokho kube yingxenye yamashares ayisilinganiso samatshumi amahlanu lanye afunwa nguhulumende.

Amankampani la abekhangelelwe ukuthi aveze indlela zokwabela abansundu amashares ngenyanga ephelileyo emele aqalise njalo ukwaba amashares la ngoMpandula.

Ikhomithi yedale lephalamende ehlolisisa imthetho yelizwe ithi ingeke yavuma ukuthi amankampani ezemigodi athathwe nguhulumende ngodlakela.

Omunye wamalunga ekhomithi le uMnu. Thandeko Zinti Mnkandka uthi kumele kulungiswe iziqondiso zomthetho wokwabelana amashares emigodi ukwenzela ukuthi lwenziwe kahle.

XS
SM
MD
LG