Ugatsha lukahulumende olubona ngokwethulwa kwembiko luthi imota ezinkulu ezama trucks sezilakho ukungena eChimanimani eManicaland lempahla zokusiza abantu abahlaselwe lizulu lesiphepho eleCyclone Idai kulindawo.
Umongameli Emmerson Mnangagwa ubeseChimanimani ngoLwesithathu, lapho atshele abantu ukuthi bazathola ukudla kanye lemithi eyokubasiza, njalo ezinye zalezo impahla sezivele zikhona eMutare.
Izimota kanye lendizamtshina bezingafinyeleli kwezinye indawo eManicaland ngoba amabholoho edabukile kumbe egcwele amanzi. Emigwaqweni bekungahambeki ngoba idilizwe yilelizulu, elibulele abantu phose abalikhulu. Kucatshangelwa ukuthi inani leli lingakhuphuka ngoba kungazakali ukuthi abantu abedlula amakhulu amabili bangaphi.
Inhlanganiso ebona ngokuhlenga abantu abasengozini eyeCivil Protection Unit imanyene le Joint Operations Committee ibikwa ihlolisise umumo eChikomba njalo yavula enye indawo yokusiza abantu eyeCommand Center eChivu.
Kusenjalo uNkosikazi Loveness Makawure oweMakoni South, njalo eyisiphathamandla sebandla leMDC kulindawo uthi umonakalo osesigabeni sakhe wenqabela abantu ukuthi belungiselele ukuthengisa igwayi labo ngoba bedilikelwe yizindlu lapho okumele belilungisele khona.
