Uhulumende weZimbabwe uthi kuqakathekile ukuba lemisakazo kanye lamaphephandaba akhululekileyo ukwenzela ukuthi kube lozibuse ophezulu elizweni.
Lokhu kwethulwe nguNkosikazi Monica Mutsvangwa ngesikhathi umhlaba wonke jikelele ngeSonto unanza usuku lweWorld Press Freedom Day.
Embikweni wakhe awethule ngoMgqibelo, uNkosikazi Mutsvangwa, umphathintambo wohlangothi lukahulumende olubona ngokwethulwa kwemibiko, uthe ukuze kube lombuso obalulekileyo kumele intathelizindaba zivunyelwe ukuthapha indaba zikhululekile.
Uphinde wathi uhulumende weZimbabwe uzama ngamandla wonke ukuthi aguqule imithetho ebonakala engani iyimigoqo evimba ukuthatshwa kwemibiko elizweni. Kasenelisanga ukukhuluma laye ngodaba lolu.
Ophethe ikhomithi yedale lephalamende ebona ngokwethulwa kwemithetho, uMnu. Prince Dubeko Sibanda, uthi kuqakathekile ukuthi intathelizindaba zithaphe indaba zikhululekile ngakho-ke kumele kuguqulwe imithetho evimba lokhu.
UMnu. Leopold Munhende, okunhlanganiso yeYoung Journalists Association of Zimbabwe, uthi akulamkantsho okukhulunywe nguNkosikazi Mutsvangwa.
Umqondisi womsakazo weVoice of America, uNkosikazi Amanda Bennet, laye uthi kuqakathekile ukuthi kube lemisakazo lamaphephandaba akhululekileyo.
“ICoronavirus iveza ukuqakatheka kwezokwethulwa kwezindaba njengoba kulemibiko eminengi eyethulwa ngabantu abatshiyeneyo. Ngakho-ke abantu bamelele ukuzwa ngathi indaba ezimqotho. Emhlabeni wonke jikelele abantu bathembe thina ekwethulweni kwezindaba, ikakhulu ngomkhuhlane weCoronavirus okwamanje.”
Okhokhela uhlangothi lwezokuqhutshwa kwenhlelo kunhlanhaniso yeMISA, uMnu. Nyasha Nyakunu, uchasisa ngesimo senthathelizindaba eZimbabwe.
Usuku lweWorld Press Freedom Day lonyaka lunanzwa ngaphansi kwesihloko esithi ‘Journalism without Fear of Favour.’
